రక్తదానం.. ఒక ప్రాణానికి జీవనదానం

జూన్ 14 ప్రపంచ రక్తదాతల దినోత్సవం. ప్రాణాలను కాపాడే స్వచ్ఛంద రక్తదాతల సేవలను గుర్తించి వారికి కృతజ్ఞతలు తెలియజేయడంతో పాటు, మరింత మంది రక్తదానానికి ముందుకు రావాలనే ఉద్దేశంతో ప్రతి సంవత్సరం ఈ దినోత్సవాన్ని నిర్వహిస్తారు. మనిషి ఎన్నో అద్భుత ఆవిష్కరణలు చేసినప్పటికీ, ఇప్పటికీ కృత్రిమంగా పూర్తిస్థాయిలో తయారు చేయలేని అమూల్యమైన జీవనాధారం రక్తం. ప్రమాదాలు, శస్త్రచికిత్సలు, ప్రసవాలు లేదా ఇతర అత్యవసర పరిస్థితుల్లో రోగికి అవసరమయ్యేది మరో మనిషి ఇచ్చిన రక్తమే. అందుకే రక్తదానం కేవలం వైద్యపరమైన చర్య కాదు. అది మానవత్వానికి ప్రతీక. ధన వంతుడైనా, పేదవాడైనా, విద్యావంతుడైనా, సామాన్యుడైనా తన రక్తాన్ని దానం చేయడం ద్వారా మరొకరికి జీవించే అవకాశాన్ని అందించగలడు. ఒక చిన్న నిర్ణయం ఒక కుటుంబంలో ఆశను నింపగలదు. ఒక రక్తదాత తెలియ కుండానే ఎవరో ఒకరి జీవితంలో హీరోగా నిలుస్తాడు. వైద్యరంగం ఎంత అభివృద్ధి చెందినా రక్తానికి ప్రత్యామ్నాయం ఇంకా కనుగొనబడలేదు. ఆసుపత్రుల్లో ప్రతిరోజూ వేలాది యూనిట్ల రక్తం అవసరమవుతోంది. అయినప్పటికీ అవ సరానికి తగినంత రక్తం అందుబాటులో లేక పోవడం ఆందోళన కలిగించే అంశం. రక్తదానం వల్ల బలహీనత వస్తుందనే అపోహలు ఇంకా ఉన్నాయి. అయితే వైద్య నిపుణుల సూచనల ప్రకారం ఆరోగ్యవంతులు నిర్దిష్ట వ్యవధిలో రక్తదానం చేయడం సురక్షితమే కాక సామాజిక బాధ్యత కూడా. రక్తదానం ఒక రోజు కార్యక్రమంగా కాకుండా సామాజిక ఉద్యమంగా మారాలి. విద్యాసంస్థలు, స్వచ్ఛంద సంస్థలు, యువజన సంఘాలు అవగాహన పెంచాలి. ముఖ్యంగా యువత ఈ ఉద్యమానికి వెన్నెముకగా నిలవాలి. రక్తదానం అంటే కేవలం రక్తాన్ని ఇవ్వడం కాదు. ఆశను, ధైర్యాన్ని, జీవనాన్ని ఇవ్వడం. మన హృదయం కొట్టుకోవడం సహజం. కానీ మరో హృదయం కొట్టుకునేలా చేయడం మహోన్నతం. అందుకే రక్తదానం దానం కాదు.. మానవత్వం తన అత్యున్నత రూపంలో వ్యక్తమయ్యే క్షణం.

(నేడు ప్రపంచ రక్తదాతల దినోత్సవం)

-చిటికెన కిరణ్ కుమార్

94908 41284