ఘోర ప్రమాదం: లారీని ఓవర్టేక్ చేయబోయి ఇద్దరు బలి!
గురువారం మధ్యాహ్నం చక్రాయపేటలో జరిగిన ప్రమాదంలో ఇద్దరు వాహనదారులు దుర్మరణం చెందారు.
దిశ, వెబ్డెస్క్: కడప జిల్లా చక్రాయపేట మండలంలో గురువారం మధ్యాహ్నం ఘోర రోడ్డు ప్రమాదం చోటుచేసుకుంది. మండల పరిధిలోని కొండప్పగారిపల్లె గ్రామ సమీపంలో రెండు ద్విచక్ర వాహనాలు (స్కూటీలు) ఒకదానికొకటి బలంగా ఢీకొన్న ఈ ఘటనలో ఇద్దరు వ్యక్తులు అక్కడికక్కడే ప్రాణాలు కోల్పోయారు. మృతులను నాగిరెడ్డి (35), కుందా శేఖర్ (45)గా పోలీసులు గుర్తించారు.
ప్రమాదానికి సంబంధించిన వివరాల ప్రకారం.. ముందు వెళ్తున్న ఒక లారీని ఓవర్టేక్ చేసే క్రమంలో రెండు స్కూటీలు అత్యంత వేగంగా ఎదురెదురుగా వచ్చాయి. లారీని దాటి ముందుకు వెళ్లే తొందరలో వాహనదారులు ఒకరినొకరు గమనించుకోకపోవడంతో ఈ ప్రమాదం సంభవించినట్లు తెలుస్తోంది. రెండు వాహనాలు వేగంగా ఉండటంతో ఢీకొన్న ధాటికి వాహనదారులు ఇద్దరూ ఎగిరి రోడ్డుపై పడ్డారు. తలకు తీవ్ర గాయాలు కావడంతో వారు సంఘటనా స్థలంలోనే మృతి చెందారు.
స్థానికుల సమాచారంతో చక్రాయపేట పోలీసులు వెంటనే ఘటనా స్థలానికి చేరుకున్నారు. మృతదేహాలను స్వాధీనం చేసుకుని, పోస్టుమార్టం నిమిత్తం స్థానిక ప్రభుత్వ ఆసుపత్రికి తరలించారు. అతివేగం మరియు అజాగ్రత్తగా ఓవర్టేక్ చేయడమే ఈ ప్రమాదానికి ప్రధాన కారణమని ప్రాథమికంగా నిర్ధారించారు. పోలీసులు కేసు నమోదు చేసి దర్యాప్తు జరుపుతున్నారు. మృతుల కుటుంబాల్లో ఈ ఘటన తీవ్ర విషాదాన్ని నింపింది.
