నా భార్య బాలీవుడ్ స్టార్ హీరోలతో నటించింది.. షాపింగ్ నిజాలు చెప్పిన గడ్డం నవీన్

దిశ, వెబ్ డెస్క్: జబర్దస్త్ టీవీ కార్యక్రమం ద్వారా మంచి గుర్తింపును సంపాదించుకున్న వారిలో గడ్డం నవీన్ ఒకరు. ఈయన అసలు పేరు ఎటిక నవీన్. కానీ ఎప్పుడూ గడ్డంతో కనిపిస్తూ ఉండడం వల్ల ఈయన గడ్డం నవీన్ గా ప్రేక్షకుల్లో ప్రత్యేక గుర్తింపు పొందారు. తాజాగా ఈ నటుడు ఓ ఇంటర్వ్యూలో పాల్గొని తన భార్య గురించి అనేక ఆసక్తికర విషయాలను వెల్లడించారు.

తన భార్య ఎన్నో బాలీవుడ్ చిత్రాల్లో నటించిందని, అలాగే పలువురు స్టార్ హీరోయిన్లకు బాడీ డబుల్‌గా కూడా పనిచేసిందని ఆయన తెలిపారు. గడ్డం నవీన్ మాట్లాడుతూ... తన భార్య ప్రముఖ బాలీవుడ్ హీరోయిన్లు అయిన ఊర్మిళ, నమ్రతా శిరోద్కర్, మాధురి దీక్షిత్, పూజా భట్ వంటి అనేక మంది స్టార్ హీరోయిన్లకు బాడీ డబుల్‌గా పనిచేసిందని వెల్లడించారు.

హీరోయిన్ల డేట్స్ అందుబాటులో ఉన్న సమయంలో ముఖ్యమైన సన్నివేశాలు, క్లోజప్ షాట్లు చిత్రీకరించేవారని, ఆ తరువాత హీరోయిన్ ముఖం కనిపించని సన్నివేశాలను తన భార్యపై చిత్రీకరించేవారని తెలిపారు. అలాగే బాలీవుడ్ స్టార్ హీరోలు అయిన అభిషేక్ బచ్చన్, ఆర్. మాధవన్, జాకీ ష్రాఫ్, అమితాబ్ బచ్చన్, షారుక్ ఖాన్ లాంటి ప్రముఖ నటులతో కూడా తన భార్య నటించిందని గడ్డం నవీన్ తెలిపారు. ఇలా గడ్డం నవీన్ తన భార్య గురించి వెల్లడించిన ఈ ఆసక్తికర విషయాలు ప్రస్తుతం ప్రేక్షకులను ఆశ్చర్యానికి గురి చేస్తున్నాయి.