కన్నప్పపై ట్రోల్స్ రాకపోవడానికి కారణమిదే : మంచు విష్ణు

దిశ, వెబ్‌డెస్క్: తన 20 ఏళ్ల సినీ జీవితంలో తనను పూర్తిగా ప్రతినిధిగా నిలబెట్టే సినిమా ‘కన్నప్ప’నేనని (Kannappa) హీరో మంచు విష్ణు (Manchu Vishnu) అన్నారు. ముకేశ్ కుమార్ సింగ్ దర్శకత్వంలో తెరకెక్కిన ఈ చిత్రంలో విష్ణు ప్రధాన పాత్రలో నటించగా, ప్రముఖ నటుడు మోహన్‌బాబు కీలక పాత్ర పోషించారు. ఇటీవల విడుదలైన ఈ చిత్రం థియేటర్ల వద్ద మంచి స్పందనను పొందింది. ఈ సందర్భంగా హైదరాబాద్‌లో ఏర్పాటు చేసిన థ్యాంక్స్ మీట్‌లో (Kannappa Thanks Meet) చిత్ర బృందం పాల్గొని ప్రేక్షకులకు, సాంకేతిక బృందానికి కృతజ్ఞతలు తెలిపారు.

మంచు విష్ణు మాట్లాడుతూ, గతంలో చేసిన చిత్రాలు పెద్దగా ఆడకపోయినా దేవుడిపై నమ్మకాన్ని కోల్పోలేదన్నారు. తన తండ్రి ఎదుట తానేంటో నిరూపించుకోవాలన్న సంకల్పంతో ఈ చిత్రాన్ని చేశానని చెప్పారు. ఏప్రిల్‌లో విడుదల చేయాలనుకున్న సినిమాను ప్రముఖ దర్శకుడు రామ్‌గోపాల్ వర్మ (Ram Gopal Varma) చెప్పిన మాటల వల్ల వాయిదా వేశానని పేర్కొన్నారు. రచయిత బీవీఎస్ రవి వ్యాఖ్యలపై స్పందించిన ఆర్జీవీ, విష్ణు వంటి వ్యక్తి గ్రాఫిక్స్ విషయంలో నిర్లక్ష్యం చేయడు అన్న మాట చెప్పగా, ఆ మాటలు తనకు ఆలోచన కలిగించాయని తెలిపారు.

వీఎఫ్‌ఎక్స్ ఆశించిన స్థాయిలో లేకపోవడం వల్ల కొన్ని ముఖ్యమైన సన్నివేశాలను తొలగించాల్సి వచ్చిందని, అయితే బలమైన కథనంతో ప్రేక్షకులు ఆ లోపాలను గమనించలేదని అన్నారు. తన తాతయ్య మరణించనున్న సంగతి తెలిసిన తర్వాత తండ్రి తీసుకున్న బాధ్యతను గమనించి, ఆ అనుభూతిని ఓ సన్నివేశంగా సినిమాలో చూపించానని చెప్పారు.

విష్ణు మాట్లాడుతూ, ఈ చిత్రం ప్రేక్షకులను ట్రోలింగ్ చేసే అవకాశం లేకుండా ముంచెత్తిందన్నారు. కొన్ని లోపాలు ఉన్నా, చివరి గంటలో ప్రేక్షకులు పూర్తిగా లీనమైపోయారని పేర్కొన్నారు. ప్రభాస్ కారణంగా సినిమా మారిందని అనుకుంటున్నా, నిజంగా మార్పు శరత్‌కుమార్ సన్నివేశం నుంచే మొదలైందన్నారు. ‘కన్నప్ప’ సినిమానే తనకొక గుర్తింపు కార్డుగా భావిస్తున్నట్టు పేర్కొన్నారు. ఆర్థికంగా, వ్యక్తిగతంగా ఎదురైన ఒత్తిడిని తన కుటుంబం భరిస్తూ నిలిచిందని, వారికి జీవితాంతం రుణపడి ఉంటానని చెప్పారు.

ఈ సినిమా తనలో వినయం పెంచిందని, ప్రాజెక్ట్ మొత్తం సమయంలో ఎప్పుడూ వెనక్కి తగ్గే ఆలోచన రాలేదన్నారు. ప్రభాస్‌ ఉన్నందువల్లే సినిమాకు మంచి ఓపెనింగ్ వచ్చిందని, ఆయన హాజరైందే సినిమా చూసేందుకు ప్రేక్షకులు ముందుకు వచ్చారని చెప్పారు. మొదటి టీజర్‌లో తక్కువ వీఎఫ్‌ఎక్స్ కారణంగా విమర్శలు ఎదురైనా, ప్రేక్షకుల నమ్మకాన్ని గెలుచుకున్నామని అన్నారు. ఈ చిత్ర కథను తెలుగు పరిశ్రమలో ఎవరూ చేయలేరన్న నమ్మకం తనకుందని, ఇది తనకు జీవితాంతం గుర్తుండిపోయే అనుభవమని తెలిపారు.