తెలుగులోకి మలయాళ బ్లాక్ బస్టర్ చిత్రం.. రిలీజ్ డేట్ ప్రకటించిన టీమ్

దిశ, సినిమా: మలయాళంలో బ్లాక్ బస్టర్ హిట్ అందుకున్న చిత్రాలను తెలుగు ప్రేక్షకులకు అందించేందుకు మన దర్శకనిర్మాతలు ప్రయత్నిస్తుంటారు. ఇందులో భాగంగానే ఇప్పటికే వచ్చిన ‘ప్రేమలు’, ‘మంజుమ్మెల్ బాయ్స్’ వంటి చిత్రాలు తెలుగులోను విడుదలై ఇక్కడ కూడా హిట్ సొంతం చేసుకున్నాయి. ఇప్పుడు వాటి తరహాలోనే మరో బ్లాక్ బస్టర్ చిత్రం తెలుగు ప్రేక్షకుల ముందుకు వచ్చేందుకు సిద్ధం అవుతున్నది. డెబ్యూ డైరెక్టర్ సవిన్ ఎస్.ఎ దర్శకత్వంలో తెరకెక్కిన యూత్‌ఫుల్ కామెడీ చిత్రం ‘వాలా 2’. ఈ మలయాళ చిత్రం కేరళలో భారీ విజయాన్ని అందుకుని బాక్సాఫీస్ వద్ద కోట్లల్లో వసూళ్లు రాబట్టి బ్లాక్ బస్టర్ హిట్‌ను సొంతం చేసుకుంది.

ఇప్పుడు ఈ మ్యాజిక్‌ను తెలుగులోనూ పునరావృతం చేసేందుకు చిత్ర బృందం సిద్ధమైంది. ఈ మేరకు రిలీజ్ డేట్‌ను ప్రకటిస్తూ.. ‘ఆ నవ్వులు, ఆ సందడి, ఆ స్నేహబంధం.. ఇప్పుడు తెలుగులోకి రాబోతున్నది.. 2026లో అతిపెద్ద మలయాళ బ్లాక్‌బస్టర్‌గా నిలిచిన వాలా 2, ఏప్రిల్ 24న తెలుగు ప్రేక్షకుల ముందుకు రావడానికి సిద్ధమైంది.. ఈ సంచలన బ్లాక్‌బస్టర్‌ను వెండితెరపై వీక్షించడానికి సిద్ధంగా ఉండండి’ అంటూ ఓ పోస్టర్ రిలీజ్ చేశారు. కాగా.. ఈ మూవీలో హషీర్ హెచ్, అలన్ బిన్ సిరాజ్, అజిన్ జాయ్, వినాయక్ వి ప్రధాన పాత్రల్లో నటించారు. మారుతున్న కాలానికి అనుగుణంగా యువత ఆలోచనలు, వారి స్నేహం, జీవితంలో ఎదుర్కొనే సరదా సంఘటనల సమాహారంగా ఈ సినిమా సాగుతుంది.