ప్రభుత్వ లాంఛనాలతో భాగ్యరాజ్ అంత్యక్రియలు.. కన్నీటి వీడ్కోలు పలికిన సినీ లోకం

దిశ, డైనమిక్ బ్యూరో: ప్రముఖ సీనియర్ నటుడు, దర్శక-రచయిత కె. భాగ్యరాజ్ అంత్యక్రియలు చెన్నైలో ఇవాళ (జూన్ 28) ప్రభుత్వ లాంఛనాలతో ముగిశాయి. ఆయన పార్థివ దేహానికి పోలీసులు గాలిలోకి కాల్పులు జరిపి అధికారిక గౌరవ వందనం సమర్పించారు. భాగ్యరాజ్ నివాసం నుంచి బీసెంట్ నగర్ శ్మశానవాటిక వరకు అశ్రునయనాల మధ్య అంతిమయాత్ర సాగింది. జూన్ 27న తుది శ్వాస విడిచిన ఈ దిగ్గజ దర్శకుడికి తమిళ సినీ పరిశ్రమ, రాజకీయ ప్రముఖులు బరువెక్కిన హృదయాలతో కడసారి వీడ్కోలు పలికారు. తమిళనాడు ముఖ్యమంత్రి సీ. జోసెఫ్ విజయ్, అగ్ర హీరోలు రజనీకాంత్, కమల్ హాసన్ తదితరులు ఆయన నివాసానికి చేరుకుని పార్థివ దేహానికి పూలమాలలు వేసి నివాళులర్పించారు. భాగ్యరాజ్ భార్య పూర్ణిమ, కుమారుడు శంతనులను పరామర్శించి ప్రగాఢ సానుభూతి తెలిపారు. ఈ సందర్భంగా హీరో ధనుష్ కన్నీటిపర్యంతం అయ్యారు. శంతనును హత్తుకుని తీవ్ర భావోద్వేగానికి గురయ్యారు. మరోవైపు, ప్రముఖ నటులు పార్తీబన్, శరత్ కుమార్ తదితరులు భాగ్యరాజ్ పాడె మోసి తమ ఆత్మీయతను చాటుకున్నారు. పలువురు సినీ ప్రముఖులు సోషల్ మీడియా వేదికగా ఆయనకు సంతాపం ప్రకటించారు.

తమిళనాట చెరగని ముద్ర..

నటుడిగా, దర్శకుడిగా, నిర్మాతగా, నవలా రచయితగా భారతీయ చలనచిత్ర రంగానికి భాగ్యరాజ్ చేసిన సేవలు అనన్య సామాన్యం. తన సుదీర్ఘ కెరీర్‌లో 75కు పైగా చిత్రాల్లో నటించిన ఆయన, 25కు పైగా సినిమాలకు దర్శకత్వం వహించారు. ‘ముందానై ముడిచు’ చిత్రానికి గానూ ఆయన ఫిల్మ్‌ఫేర్ ఉత్తమ నటుడి అవార్డును గెలుచుకున్నారు. ఆయన మృతితో తమిళంతో పాటు తెలుగు చిత్ర పరిశ్రమలో తీవ్ర విషాదం నెలకొంది.