ఎవరు ఊహించని బ్యూటీతో 'పెద్ది' ఐటమ్ సాంగ్ ప్లాన్

దిశ, వెబ్ డెస్క్: రామ్ చరణ్ హీరోగా తెరకెక్కుతున్న 'పెద్ది' సినిమాలో ఐటమ్ సాంగ్ గురించి కొంతకాలంగా పెద్ద ఎత్తున చర్చ కొనసాగుతోంది. ఈ చిత్రానికి సంబంధించిన షూటింగ్ దాదాపు పూర్తయ్యిందని, కేవలం ఒకే ఒక్క పాట చిత్రీకరణ మాత్రమే మిగిలి ఉందని రామ్ చరణ్ ఇటీవల 'రాకాస' సినిమా ప్రమోషన్ల సందర్భంగా వెల్లడించారు. ఆ మిగిలిన పాట ఐటమ్ సాంగ్ అని సమాచారం. ఆ పాట చిత్రీకరణ పూర్తైతే ఈ సినిమా షూటింగ్ మొత్తం ముగియనున్నట్లు తెలుస్తోంది. దీంతో ఆ ఐటమ్ సాంగ్‌లో ఎవరు నటిస్తారనే అంశంపై ప్రేక్షకుల్లో ఆసక్తి నెలకొంది. మొదట ఈ పాటలో మృణాల్ ఠాకూర్ నటించే అవకాశాలు ఉన్నట్లు వార్తలు వినిపించాయి. అనంతరం మరికొంతమంది స్టార్ హీరోయిన్ల పేర్లు కూడా ప్రచారంలోకి వచ్చాయి.

తాజాగా, ఎవరు ఊహించని ఓ యంగ్ బ్యూటీ పేరు తెరపైకి వచ్చింది. ఇటీవల వరుస సినిమాలతో ప్రేక్షకులను ఆకట్టుకుంటున్న మానస వారణాసిని ఈ చిత్రంలోని ఐటమ్ సాంగ్ కోసం ఎంపిక చేయాలని దర్శకుడు బుచ్చిబాబు సనా ఆలోచిస్తున్నట్లు సమాచారం. ఇప్పటికే ఆమెతో ప్రాథమిక చర్చలు కూడా జరిపినట్లు వార్తలు వినిపిస్తున్నాయి. అన్నీ అనుకున్నట్లు జరిగితే, ఈ క్రేజీ బ్యూటీ 'పెద్ది' చిత్రంలోని ఐటమ్ సాంగ్‌లో కనిపించే అవకాశాలు ఉన్నట్లు తెలుస్తోంది. ఈ చిత్రంలో రామ్ చరణ్ సరసన జాన్వీ కపూర్ హీరోయిన్‌గా నటిస్తుండగా, జగపతిబాబు, శివ రాజ్ కుమార్ కీలక పాత్రల్లో కనిపించనున్నారు. వృద్ధి సినిమాస్ బ్యానర్‌పై నిర్మితమవుతున్న ఈ చిత్రానికి బుచ్చిబాబు సనా దర్శకత్వం వహిస్తున్నారు. ఏ.ఆర్. రెహమాన్ ఈ చిత్రానికి సంగీతం అందిస్తున్నారు.