పులివెందులలో వైఎస్ జగన్ 'క్రిస్మస్' పర్యటన: నేటి నుంచి మూడు రోజుల పాటు బిజీ షెడ్యూల్!

దిశ, వెబ్‌డెస్క్: వైఎస్సార్ కాంగ్రెస్ పార్టీ అధినేత, మాజీ సీఎం వైఎస్ జగన్ మోహన్ రెడ్డి (Former CM YS Jagan Mohan Reddy) నేటి నుంచి తన సొంత నియోజకవర్గం పులివెందులలో మూడు రోజుల పాటు పర్యటించనున్నారు. క్రిస్మస్ పండుగ (Christmas festival)ను పురస్కరించుకుని నిర్వహించనున్న ఈ పర్యటనలో ఆయన ఆధ్యాత్మిక కార్యక్రమాలతో పాటు ప్రజలతో నేరుగా మమేకం కానున్నారు. నేడు (డిసెంబర్ 23) సాయంత్రం పులివెందుల క్యాంపు కార్యాలయంలో ఆయన 'ప్రజాదర్బార్' నిర్వహించి, స్థానిక నాయకులు, కార్యకర్తల నుంచి వినతులు స్వీకరించనున్నారు. ఈ పర్యటన ద్వారా తన సొంత నియోజకవర్గం ప్రజలకు అందుబాటులో ఉంటూ పార్టీ శ్రేణుల్లో నూతనోత్సాహం నింపేందుకు జగన్ సిద్ధమయ్యారు.

పర్యటనలో భాగంగా రేపు (డిసెంబర్ 24) ఉదయం ఇడుపులపాయలో జరిగే క్రిస్మస్ ప్రత్యేక ప్రార్థనల్లో జగన్ పాల్గొంటారు. అనంతరం సాయంత్రం భాకరాపురం క్యాంప్ ఆఫీస్ లో మరోసారి ప్రజాదర్బార్ నిర్వహించి ప్రజల సమస్యలను అడిగి తెలుసుకోనున్నారు. పర్యటన చివరి రోజున, అంటే డిసెంబర్ 25వ తేదీన పులివెందుల పట్టణంలోని సీఎస్ఐ (CSI) చర్చిలో జరిగే క్రిస్మస్ వేడుకల్లో తన కుటుంబ సభ్యులతో కలిసి పాల్గొని ప్రత్యేక ప్రార్థనలు చేయనున్నారు. మాజీ ముఖ్యమంత్రి రాకను పురస్కరించుకుని నియోజకవర్గ వ్యాప్తంగా వైఎస్సార్‌సీపీ శ్రేణులు భారీ ఏర్పాట్లు చేశాయి.