ఏపీలో మున్సిపల్ ఎన్నికల నగారా.. 3,942కు చేరనున్న వార్డుల సంఖ్య!
ఆంధ్రప్రదేశ్లో మున్సిపల్ ఎన్నికలకు కసరత్తు మొదలైంది. 87 మున్సిపాలిటీలు, 13 కార్పొరేషన్లలో వార్డుల పునర్విభజన ప్రక్రియను అధికారులు ప్రారంభించారు.
దిశ, వెబ్డెస్క్: ఆంధ్రప్రదేశ్ (Andhra Pradesh)లో పట్టణ స్థానిక సంస్థల ఎన్నికల నిర్వహణకు రంగం సిద్ధమైంది. రాష్ట్రంలోని 87 మున్సిపాలిటీలు, 13 కార్పొరేషన్లలో వార్డుల పునర్విభజన (Delimitation) ప్రక్రియను ప్రభుత్వం అధికారికంగా ప్రారంభించింది. ఈ ప్రక్రియ ముగిసిన వెంటనే ఎన్నికల నిర్వహణకు వెళ్లాలని రాష్ట్ర ఎన్నికల సంఘం (SEC) భావిస్తోంది. ప్రస్తుతం ఆయా మున్సిపాలిటీలు, కార్పొరేషన్లలో కలిపి మొత్తం 3,206 వార్డులు, డివిజన్లు ఉన్నాయి. 2011 జనాభా లెక్కల ప్రకారం పునర్విభజన చేపడుతుండటంతో కొత్తగా మరో 736 వార్డులు పెరిగే అవకాశం ఉంది. దీంతో మొత్తం వార్డుల సంఖ్య 3,942కు చేరుకోనుంది. పెరిగిన జనాభాకు అనుగుణంగా వార్డుల సరిహద్దులను మార్చడం, ఓటర్ల సంఖ్యను సమతుల్యం చేయడంపై అధికారులు దృష్టి సారించారు.
ఆగస్టు, సెప్టెంబర్లో ఎన్నికలు..?
డీలిమిటేషన్ ప్రక్రియను వేగంగా పూర్తి చేసి, ఆగస్టు లేదా సెప్టెంబర్ నెలల్లో మున్సిపల్ ఎన్నికలు నిర్వహించాలని ఎస్ఈసీ (SEC) ప్రణాళికలు సిద్ధం చేస్తోంది. వార్డుల విభజన ప్రక్రియ ముగిసిన వెంటనే ఓటర్ల జాబితా తయారీ, రిజర్వేషన్ల ఖరారు వంటి కీలక ఘట్టాలు పూర్తి కానున్నాయి. మరోవైపు, రాష్ట్రంలోని మరో 23 పట్టణ స్థానిక సంస్థలకు సంబంధించి కోర్టుల్లో కేసులు పెండింగ్లో ఉన్నాయి. ఈ న్యాయపరమైన చిక్కులు తొలగి, తుది తీర్పు వెలువడిన తర్వాతే ఆయా చోట్ల ఎన్నికల నిర్వహణపై అధికారులు నిర్ణయం తీసుకోనున్నారు. వార్డుల విభజన ప్రక్రియ ప్రారంభం కావడంతో అప్పుడే రాష్ట్రంలో రాజకీయ వేడి మొదలైంది. ప్రధాన పార్టీలన్నీ అభ్యర్థుల ఎంపిక, వార్డుల వారీగా సమీకరణాలపై దృష్టి సారించాయి.
