Jagan V/s Pawan: జగన్ వర్సెస్ ​పవన్.. ఏపీలో పొలిటికల్​ హీట్​

దిశ, డైనమిక్​ బ్యూరో: ఏపీలో ఎండలు ఇప్పుడిప్పుడే పెరుగుతున్నాయి.. మరో వైపు పొలిటికల్​హీట్​కూడా పెరుగుతోంది. కొద్దిరోజుల కిందట అసెంబ్లీ (AP Assembly)బడ్జెట్​సమావేశాలు ప్రారంభమయ్యాయి. ఈ సమావేశాలకు వైసీపీ అధినేత వైఎస్​జగన్​తన మిగిలిన పదిమంది పార్టీ ఎమ్మెల్యేలతో కలిసి హాజరయ్యారు. కేవలం 11 నిమిషాలపాటే అసెంబ్లీలో ఉండి వెళ్లిపోయారు. అటెండెన్స్​కోసమే ఆయన వచ్చాడని టీడీపీ(TDP) ఆరోపించింది. ఆ తర్వాత ఈ రోజు జగన్​తన పార్టీ కేంద్ర కార్యాలయంలో విలేకరులతో మాట్లాడారు. ఈ సందర్భంగా కూటమి ప్రభుత్వంపై విమర్శలు చేస్తూనే జనసేన పార్టీ అధినేత పవన్​ కల్యాణ్​పై ఘాటు వ్యాఖ్యలు చేశారు. పవన్‌ కార్పొరేటర్‌కు ఎక్కువ.. ఎమ్మెల్యేకు తక్కువ అంటూ ఎద్దేవా చేశారు. పవన్‌ జీవిత కాలంలో ఇప్పుడు ఎమ్మెల్యే అయ్యారని అన్నారు. అసెంబ్లీలో రెండే పక్షాలు ఉంటాయి, ప్రతిపక్షాన్ని గుర్తించకపోతే ఎలా అని ప్రశ్నించారు. సభలో ఇంతమంది సభ్యులు ఉంటేనే ప్రతిపక్ష హోదా (Opposition status)ఉంటుందని ఎక్కడా రూల్‌ లేదన్నారు. చంద్రబాబుకు ప్రతిపక్ష హోదా నేనే ఇచ్చానన్నారు. ఎంతసేపైనా మాట్లాడమని చంద్రబాబుకు మైక్ ఇచ్చానని గుర్తు చేశారు.

అసెంబ్లీ సమావేశాల తొలిరోజు గవర్నర్​ప్రసంగం అనంతరం.. పవన్​కల్యాణ్ (Pawan Kalyan)​మీడియా పాయింట్​లో కొన్ని కీలక వ్యాఖ్యలు చేశారు. ఈ ఐదేళ్లలో మీకు ప్రతిపక్ష హోదా రాదంటూ జగన్​ను ఉద్దేశించి తేల్చి చెప్పారు. ప్రతిపక్ష హోదా కావాలంటూ పట్టుపట్టడం మాని అసెంబ్లీకి వచ్చి తమ సమస్యలు వినిపించాలని ఆయన సూచించారు. పైగా ప్రతిపక్ష హోదా అడిగితే ఇచ్చేది కాదన్నారు. ప్రజలే ఆ హోదా జగన్‌కు ఇవ్వలేదని గుర్తు చేశారు. జనసేన కంటే ఒక్క సీటు ఎక్కువ వచ్చినా ప్రతిపక్ష హోదా వచ్చేదన్నారు. ప్రతిపక్ష హోదా కావాలంటే జగన్​ జర్మనీకి వెళ్లవచ్చని సూచించారు. ఇదే విషయాన్ని ఈ రోజు విలేకరులు.. జగన్​వద్ద ప్రశ్నించగా ఆయన పవన్​పై విమర్శలు చేశారు. అయితే వైసీపీ అధినేత జగన్​ఎప్పుడూ తన విమర్శనాస్త్రాలు చంద్రబాబు (Chandra babu), ఆయన కుమారుడు లోకేశ్ (Nara Lokesh)​పైనే ఎక్కుపెడుతుంటాడు. కారణాలేవైనా పవన్​పై డైరెక్టుగా వ్యాఖ్యలు చేయడం తక్కువే. అయితే ఈ సారి ఆయన పవన్​ను కార్పొరేటర్​కు ఎక్కువ.. ఎమ్మెల్యేకు తక్కువ అని అనడం జనసైనికుల్లో కాక రేపుతోంది. మాజీ సీఎం జగన్​వ్యాఖ్యలపై జనసైనికులు మండిపడుతున్నారు. జగన్​క్రిమినల్​కి ఎక్కువ.. ప్రతిపక్ష నేతకు తక్కువ అంటూ సోషల్​మీడియాలో పోస్టులు పెడుతున్నారు. ప్రజలు నీకు ఈ హోదా ఇవ్వలేదని తమ నాయకుడు పవన్​ అంటే నీకు ఎందుకంత ఏడుపని ప్రశ్నిస్తున్నారు. నాలుగు గోడల మధ్య కూర్చుని ప్రెస్​మీట్లు పెట్టడం కాదని సూచిస్తున్నారు. మొత్తం మీద జగన్​ప్రతిపక్ష హోదా అంశం.. పొలిటికల్​హీట్​(Political heat)ను పెంచింది.