సీఎం చంద్రబాబుతో బాలీవుడ్ నటుడు సంజయ్ దత్ భేటీ

దిశ, వెబ్‌డెస్క్: ఆంధ్రప్రదేశ్ సచివాలయంలో ఆసక్తికరమైన సన్నివేశం చోటుచేసుకుంది. రాష్ట్ర ముఖ్యమంత్రి నారా చంద్రబాబు నాయుడిని బాలీవుడ్ ప్రముఖ నటుడు సంజయ్ దత్ మర్యాదపూర్వకంగా కలుసుకున్నారు. మునుపెన్నడూ లేని విధంగా జరిగిన ఈ భేటీ రాజకీయ, సినిమా వర్గాల్లో తీవ్ర ఆసక్తిని రేకెత్తించింది. ముఖ్యమంత్రి ఛాంబర్‌కు చేరుకున్న సంజయ్ దత్‌కు సీఎం చంద్రబాబు ఘన స్వాగతం పలికారు. ఈ సందర్భంగా ఇరువురు నేతలు కొద్దిసేపు ఏకాంతంగా చర్చలు జరుపుకున్నారు. సంజయ్ దత్ వెంట గౌరవ్ దూబే, కునాల్ పటేల్, అనుజ్ కుమార్ కూడా ఈ భేటీలో పాల్గొన్నారు. ఈ సమావేశంలో ప్రధానంగా ఆంధ్రప్రదేశ్ రాష్ట్రంలో సినిమా పరిశ్రమ అభివృద్ధికి ఉన్న అవకాశాలపై చర్చించినట్లు తెలుస్తోంది. నూతన రాజధాని అమరావతిలో అత్యాధునిక ఫిల్మ్ సిటీ నిర్మాణానికి, అలాగే విశాఖపట్నం వంటి నగరాల్లో సినిమా షూటింగ్‌లకు కావాల్సిన మౌలిక సదుపాయాల కల్పనపై సీఎం చంద్రబాబు వివరించినట్లు సమాచారం. ఏపీ ప్రభుత్వం సినిమా రంగానికి ఇస్తున్న ప్రోత్సాహకాలు, సింగిల్ విండో క్లియరెన్స్ వంటి అంశాలను సంజయ్ దత్ బృందానికి సీఎం వివరించారు. ఈ భేటీతో రాబోయే రోజుల్లో ఆంధ్రప్రదేశ్‌కు బాలీవుడ్ నుండి మరిన్ని పెట్టుబడులు, షూటింగ్‌లు వచ్చే అవకాశం ఉందని విశ్లేషకులు భావిస్తున్నారు.