ఆశ్చర్యం.. అధికార పార్టీకీ అభ్యర్థి కరువయ్యాడు..?
దిశ, తెలంగాణ బ్యూరో : ఎమ్మెల్సీ ఎన్నికల్లో అధికార పార్టీ మల్లగుల్లాలు పడుతోంది. ఈ ఎన్నికలంటేనే గులాబీ శ్రేణులు వెనకంజ వేస్తున్నారు. రాష్ట్రంలో రెండు పట్టభద్రుల ఎమ్మెల్సీ స్థానాలకు ఎన్నికల ప్రక్రియ మొదలు కాగా, వరంగల్–నల్గొండ–ఖమ్మం స్థానానికి పల్లా రాజేశ్వర్రెడ్డి బరిలో దింపి బీఫాం కూడా అప్పగించింది. హైదరాబాద్–రంగారెడ్డి–మహబూబ్నగర్ స్థానంపై మాత్రం ఎటూ తేల్చడం లేదు. ఇక్కడ నుంచి పోటీ చేసేందుకు నేతలు కూడా దొరకడం లేదు. ఇప్పటి వరకు టికెట్ల కోసం పైరవీలు చేసిన గులాబీ నేతలు ఈ స్థానానికి మాత్రం పిలిచినా ముందుకు రావడం లేదు. మరోవైపు పార్టీ కూడా అలాగే వ్యవహరిస్తోంది.
ఇన్చార్జి ఉన్నారా..?
ప్రతి ఎన్నికను టీఆర్ఎస్ పార్టీ సవాల్గానే తీసుకుని ఆయా ఎన్నికల్లో ఒక్కొక్కరికి ఇన్చార్జి బాధ్యతలు అప్పగించిన విషయం తెలిసిందే. కానీ ఈ మండలి ఎన్నికల్లో మాత్రం అధిష్ఠానం అంటీముట్టనట్టుగానే వ్యవహరిస్తోంది. వరంగల్ స్థానానికి పల్లా రాజేశ్వర్రెడ్డి పోటీ చేస్తుండటంతో సీఎం కేసీఆర్ ఈ మూడు ఉమ్మడి జిల్లాల మంత్రులకు ఆదేశాలిచ్చి, ఈ నెల 7 న సమావేశమై మంత్రులపై బాధ్యతలు పెట్టారు. దీంతో వరంగల్, నల్గొండ, ఖమ్మం జిల్లాల మంత్రులు మండలి ప్రచారంలో దిగారు.
కానీ, హైదరాబాద్ స్థానానికి మాత్రం ఇంకా ప్లాన్ చేయలేదు. ఇప్పుడున్న పరిస్థితుల్లో ఎవరూ ముందుకు రాలేదని ప్రచారం జరుగుతోంది. కొద్ది రోజుల కిందట వరకు మాజీ మేయర్ బొంతు రామ్మోహన్, టీఎస్ఏడబ్ల్యూడీసీ చైర్మన్ నాగేందర్గౌడ్, పీఎల్ శ్రీనివాస్, శుభప్రసాద్ పటేల్తో పాటు దేవీ ప్రసాద్ కూడా పోటీకి ఆసక్తి చూపించినా తీరా సమయంలో వెనకడుగు వేస్తున్నారు. దీంతో అధికార పార్టీ డైలామాలో పడింది.
గెలుపు లేకపోవడంతోనే…
హైదరాబాద్–రంగారెడ్డి–మహబూబ్నగర్ పట్టభద్రుల ఎమ్మెల్సీ స్థానంలో టీఆర్ఎస్కు వరుస పరాజయాలు మిగిలాయి. 2007లో టీఆర్ఎస్ యెన్నం శ్రీనివాస్రెడ్డిని పోటీకి దింపగా ఓటమి పాలైంది. 2009లో ఇలాంటి పరిస్థితులే కనిపించడంతో అభ్యర్థిని వద్దనుకుంది. 2015లో ఎంతో కొంత నమ్మకంతో టీఎన్జీఓ యూనియన్ అధ్యక్షుడుగా ఉన్న దేవీ ప్రసాద్ను బరిలోకి దింపింది. ఉద్యోగానికి రాజీనామా చేయించి పోటీకి దింపింది. ఆయన కూడా ఓటమి పాలయ్యాడు. ఇలా ఈ స్థానంలో టీఆర్ఎస్ బోల్తా పడుతూనే ఉంది.
ఇప్పుడెలా..?
ప్రస్తుతం ఈ స్థానంలో పోటీకి దూరంగా ఉండేందుకే టీఆర్ఎస్ నిర్ణయం తీసుకున్నట్లు తెలుస్తోంది. ఇప్పటికే వరంగల్ స్థానానికి పల్లా రాజేశ్వర్రెడ్డికి బుధవారం బీఫాం కూడా అందించారు. హైదరాబాద్ స్థానంపై మాత్రం ఇంకా నిర్ణయం ప్రకటించడం లేదు. ప్రస్తుతం మండలి ఎన్నికల నామినేషన్ల ప్రక్రియ కొనసాగుతోంది. పట్టభద్రుల ఓటరు నమోదు సందర్భంగా టీఆర్ఎస్ చాలా హడావుడి చేసింది. గెలుపు మాదేననే రీతిలో ప్రచారం చేసింది. ఆరు జిల్లాల మంత్రులను ఎన్నికకు సిద్ధం చేసినా వాస్తవ పరిస్థితులు గుర్తించి సైలెంట్ అయింది.
మరోవైపు బీజేపీ, కాంగ్రెస్ అభ్యర్థులను ప్రకటించాయి. బీజేపీ తరుపున సిట్టింగ్ ఎమ్మెల్సీ రామచంద్రారావు, కాంగ్రెస్ నుంచి మాజీ మంత్రి చిన్నారెడ్డి పోటీ చేస్తున్నారు. కానీ టీఆర్ఎస్ మాత్రం ఎవరినీ ప్రకటించలేదు. ఆ దిశగా ప్రయత్నాలు కూడా చేయడం లేదు. ఈసారి కూడా మళ్లీ ప్రొఫెసర్ నాగేశ్వర్కు మద్దతునివ్వాలని దాదాపుగా నిర్ణయం తీసుకున్నట్లు తెలుస్తోంది. గెలిచే పరిస్థితులు లేవని, పోటీ చేసి పరువు తీసుకోవడం కంటే తటస్థంగా ఉండి మద్దతు ఇవ్వడం మంచిదనే నిర్ణయానికి వచ్చినట్లు వినికిడి.
