"రామాయణ" ట్రైలర్ రిలీజ్ వాయిదా
భారీ బడ్జెట్, అంచనాల నడుమ అత్యంత ప్రతిష్ఠాత్మకంగా రూపుదిద్దుకుంటున్న 'రామాయణ' చిత్ర ట్రైలర్ విడుదల వాయిదా పడింది.
దిశ, వెబ్ డెస్క్ : భారతీయ సినీ చరిత్రలోనే అత్యంత ప్రతిష్ఠాత్మకంగా, ఊహించని రీతిలో భారీ బడ్జెట్తో నిర్మిస్తున్న దృశ్యకావ్యం 'రామాయణ'. దేశవ్యాప్తంగానే కాకుండా అంతర్జాతీయ స్థాయిలో కూడా భారీ అంచనాలు నెలకొన్న ఈ సినిమా ట్రైలర్ విడుదల వాయిదా పడింది. ముందుగా నిర్ణయించిన ప్రకారం నేడే ఈ మోస్ట్ అవైటెడ్ ట్రైలర్ను విడుదల చేసి అభిమానులకు, ప్రేక్షకులకు విజువల్ వండర్ను పరిచయం చేయాల్సి ఉంది. అయితే చివరి నిమిషంలో ఈ వేడుకను వాయిదా వేస్తున్నట్లు ప్రకటించి ప్రొడక్షన్ హౌస్ అందరినీ ఆశ్చర్యపరిచింది. ఈ అనూహ్య నిర్ణయానికి గల బలమైన కారణాలను వివరిస్తూ చిత్ర నిర్మాత నమిత్ మల్హోత్రా తన అధికారిక ఇన్స్టాగ్రామ్ ఖాతా వేదికగా ఒక ప్రకటనను విడుదల చేశారు.
ఈ ప్రతిష్ఠాత్మక చిత్రాన్ని కేవలం భారతీయ భాషలకే పరిమితం చేయకుండా, గ్లోబల్ స్థాయిలో ప్రపంచంలో ఉన్న ప్రతి మూలకూ అత్యుత్తమ రీతిలో తీసుకువెళ్లాలనే తపనతో ప్రముఖ అంతర్జాతీయ వినోద సంస్థ 'సోనీ పిక్చర్స్' (Sony Pictures) తో భారీ ఒప్పందం కుదుర్చుకున్నట్లు నమిత్ మల్హోత్రా వెల్లడించారు. ఈ ప్రసిద్ధ హాలీవుడ్ డోమ్తో చేతులు కలపడం వల్ల సినిమా గ్లోబల్ రీచ్, డిస్ట్రిబ్యూషన్ నెట్వర్క్ ఊహించని స్థాయికి చేరుకుందని తెలిపారు. ఈ అంతర్జాతీయ భాగస్వామ్యానికి తగినట్లుగానే 'రామాయణ' ట్రైలర్ను కూడా ఒకేసారి గ్లోబల్ రేంజ్లో అత్యంత గ్రాండ్గా ఆవిష్కరించేందుకు మరొక ప్రత్యేకమైన తేదీని త్వరలోనే ఖరారు చేస్తామని స్పష్టం చేశారు.
హాలీవుడ్ అగ్రశ్రేణి సాంకేతిక విలువలకి ఏమాత్రం తీసిపోని రీతిలో, ప్రపంచం యావత్తూ ఆశ్చర్యపోయేలా మన 'రామాయణ' ఇతిహాసాన్ని దృశ్యరూపంలో చూపించడం వందేళ్ల భారతీయ చలనచిత్ర ప్రస్థానంలోనే అత్యంత గర్వకారణంగ నిలిచిపోతుందని నమిత్ మల్హోత్రా ఆశాభావం వ్యక్తం చేశారు. కేవలం ప్రచారం కోసమే కాకుండా ప్రదర్శన పరంగా కూడా ఒక అంతర్జాతీయ ప్రమాణాన్ని నెలకొల్పేందుకే ఈ నిర్ణయం తీసుకున్నామని, కొద్దిరోజుల నిరీక్షణ ప్రేక్షకులకు జీవితాంతం గుర్తుండిపోయే గొప్ప అనుభూతిని ఇస్తుందని ఆయన విశ్వాసం వ్యక్తం చేశారు.
