MMTS, మెట్రో రైలు, బస్సులకు కామన్ టికెటింగ్ సిస్టమ్.. టీ, R&B స్పెషల్ సెక్రటరీ వికాస్ రాజ్
హైదరాబాద్ నగరంలోని ఎంఎంటీఎస్ ఉప నగర రైళ్లు, మెట్రో రైలు, టీజీఎస్ ఆర్టీసీ బస్సు సేవలను పరస్పరం అనుసంధానిస్తూ ఒకే రకమైన టికెటింగ్ వ్యవస్థను తీసుకురావాలని తెలంగాణ ప్రభుత్వం నిర్ణయించింది.
హైదరాబాద్, దిశ బ్యూరో: హైదరాబాద్ నగరంలోని ఎంఎంటీఎస్ (MMTS) ఉపనగర రైళ్లు, మెట్రో రైలు, టీజీఎస్ ఆర్టీసీ (TGSRTC) బస్సు సేవలను పరస్పరం అనుసంధానిస్తూ ఒకే రకమైన టికెటింగ్ వ్యవస్థను (Common Ticketing System) తీసుకురావాలని తెలంగాణ ప్రభుత్వం నిర్ణయించింది. ప్రయాణికులకు మెరుగైన రవాణా సౌకర్యాలను కల్పించేందుకు సమగ్ర ప్రణాళికను సిద్ధం చేస్తున్నట్లు రవాణా, రోడ్లు-భవనాల శాఖ ప్రత్యేక ప్రధాన కార్యదర్శి వికాస్ రాజ్ తెలిపారు. సచివాలయంలో జరిగిన ఉన్నత స్థాయి సమావేశంలో ఆయన మాట్లాడుతూ.. ఈ ప్రాజెక్టుకు సంబంధించిన ముఖ్యాంశాలను వెల్లడించారు. మెట్రో, ఎంఎంటీఎస్, బస్సులలో ప్రయాణించేందుకు వీలుగా ఒకే టికెట్ విధానంపై అధ్యయనం చేయాలని మీ-సేవ కమిషనర్కు సూచించారు.
ప్రయాణికులు దిగిన చోటు నుండి వారి గమ్యస్థానాలకు చేరుకోవడానికి (Last-mile connectivity) ఫీడర్ సేవలను బలోపేతం చేయడం. 51 ఎంఎంటీఎస్ స్టేషన్ల పరిధిలో ఉన్న అనుసంధాన రహదారులను విస్తరించాలని జీహెచ్ఎంసీని ఆదేశించారు. రైల్వే స్టేషన్లు, మెట్రో స్టేషన్లకు దగ్గరగా బస్ స్టాప్లను ఏర్పాటు చేయడం మరియు రద్దీకి అనుగుణంగా బస్సు సర్వీసులను పునర్వ్యవస్థీకరించడం. స్టేషన్ల నుంచి కాలనీలకు వెళ్లేందుకు వీలుగా జీపీఎస్ (GPS) ఆధారిత ప్రైవేట్ షటిల్ సర్వీసులు లేదా షేర్డ్ వాహనాలను ప్రవేశపెట్టే ఆలోచన ఉంది. రైలు, మెట్రో, బస్సుల మధ్య సరైన సమన్వయం ఉన్నప్పుడే హైదరాబాద్ భవిష్యత్తు మొబిలిటీ (Mobility) వ్యవస్థ విజయవంతమవుతుందని వికాస్ రాజ్ పేర్కొన్నారు. ప్రైవేట్ వాహనాలపై ఆధారపడకుండా, సురక్షితమైన వేగవంతమైన ప్రజా రవాణాను అందించడమే ప్రభుత్వ లక్ష్యమని ఆయన స్పష్టం చేశారు.
