సిద్దిపేట డీసీసీ చీఫ్ నర్సారెడ్డికి నోటీసులు.. పార్టీ అంతర్గతాలపై మీడియాతో మాట్లాడరాదని నేతలకు మల్లు రవి హెచ్చరిక

దిశ, తెలంగాణ బ్యూరో : సిద్దిపేట డీసీసీ అధ్యక్షుడు నర్సారెడ్డి (DCC President Narsa Reddy)కి టీపీసీసీ క్రమశిక్షణ కమిటీ (TPCC Disciplinary Committee) షోకాజ్​నోటీసులు ఇచ్చింది. ఆయనపై గజ్వేల్​దళితులు ఫిర్యాదు చేశారని, దానిపైన వారం రోజుల్లో వివరణ ఇవ్వాలని చెప్పినట్లు కమిటీ చైర్మన్ మల్లు రవి చెప్పారు. క్రమశిక్షణ కమిటికి అందిన ఫిర్యాదులపై చర్చించి నిర్ణయం తీసుకునేందుకు ఆదివారం కమిటీ గాంధీ భవన్​లో సమావేశమైంది. ఈ సమావేశంలో ఇటీవల చోటు చేసుకున్న అనేక ఫిర్యాదులు చర్చించారు. సమావేశం అనంతరం మల్లురవి మీడియాతో మాట్లాడుతూ.. గజ్వేల్​లో జరిగిన వివాదానికి సంబంధించి నర్సారెడ్డిపై ఫిర్యాదులు అందాయన్నారు. దీనిపై నర్సారెడ్డిని సమావేశానికి పిలిచి మాట్లాడామని, నోటీసులకు జవాబు ఇవ్వాలని తెలిపామన్నారు. సిద్దిపేటలో పార్టీ తరఫున పోటీ చేసిన పూజల హరికృష్ణపై టీపీసీసీ చీఫ్​తనకు వచ్చిన ఫిర్యాదును కమిటికి వైస్ ​చైర్మన్​ శ్యామ్ మోహన్​కి ఇచ్చారని, దానిపై చర్చించి పూజల హరికృష్ణకు నోటీసులు ఇస్తున్నామని, వారం, పది రోజుల్లో వివరణకు సమయం ఇస్తామని మల్లు రవి చెప్పారు. ఫిర్యాదులు, వివరణలపై మరోసారి భేటీ అయిన తర్వాత నిర్ణయాలుంటాయన్నారు.

రాజ్​గోపాల్​రెడ్డిపై ఫిర్యాదులు అందలేదు, చర్చ లేదు

ఇటీవల వరుసగా వివాదాస్పద కామెంట్లు చేస్తున్న మునుగోడు ఎమ్మెల్యే కోమటిరెడ్డి రాజగోపాల్​రెడ్డి అంశంపై చర్చ జరుగలేదని మల్లు రవి చెప్పారు. ఎవరైనా ఫిర్యాదు చేస్తే చర్చిస్తామే తప్ప బయట జరుగుతున్న ప్రచారం, మీడియాలో వచ్చిన వార్తలపై కమిటీ చర్చించదన్నారు.

ఏ స్థాయి నేత అయినా పార్టీ అంతర్గత విషయాలు మీడియాతో మాట్లాడకూడదు

పార్టీలో గ్రామ స్థాయి నుంచి రాష్ట్ర స్థాయి వరకూ ఏ నేత అయినా సరే పార్టీలోని అంతర్గత అంశాలను మీడియాతో పంచుకోకూడదని మల్లు రవి స్పష్టం చేశారు. పార్టీలోని నేతలకు ఏ రకమైన సమస్యలున్నా స్థానిక డీసీసీ, పీసీసీ, సీఎం, మీనాక్షి నటరాజన్​దృష్టికి అయినా తీసుకు వచ్చి పరిష్కరించుకోవాలని, క్రమ శిక్షణతో పనిచేయాలని మల్లు రవి సూచించారు. అంతే కానీ, వ్యక్తులపై కోపంతో ఫిర్యాదులు చేయడం, మీడియాతో మాట్లాడటం సరికాదన్నారు. దాని వల్ల పార్టీకి, ఆ నేతకూ నష్టమే తప్ప ఎటువంటి ప్రయోజనం లేదన్నారు. నేతలు సంయమనం పాటించాలని రాబోయే లోకల్​బాడీ ఎన్నికల్లో సమన్వయంతో పని చేయాలన్నారు. కాంగ్రెస్​ను వీడిన వారు మళ్లీ పార్టీలోకి రావాలని తాను కోరుతున్నట్లు మల్లు రవి చెప్పారు. వరంగల్ నేతల విభేదాలపై చర్యలపై పీసీసీకి కమిటీ వేయాలని చెప్పామని, సీఎం దృష్టిలో ఉందని, పీసీసీదే తుది నిర్ణయమని ఆయన చెప్పారు.

కేటీఆర్​తాను తవ్వకున్న గుంటలో తాను పడ్డారు

కేటీఆర్​తాను తొవ్వకున్న గుంటలో ఆయనే పడ్డారని, పార్టీ ఫిరాయింపులపై కేసీఆర్, కేటీఆర్, హరీష్ ​శ్రీరంగ నీతులు చెప్తున్నారని మల్లు రవి మండిపడ్డారు. వారు రాజకీయనేతలు, మేము సన్యాసులమా అని ఆయన ఘాటుగా స్పందించారు. గతంలో కేసీఆర్​అవసరం లేకున్నా కాంగ్రెస్ లో గెలిచినోళ్లను తన పార్టీలో చేర్చుకున్నారని, ప్రతిపక్ష హోదా, దానితో పాటు కేబినెట్ హోదా కాంగ్రెస్​కు లేకుండా చేశారని మల్లు రవి మండిపడ్డారు. పార్టీ మారిన అంశంలో ఆ ఎమ్మెల్యేలను స్పీకర్ వివరణ అడుగుతారని, పార్టీ మారలేదు అని ఎమ్మెల్యేలు చెప్తున్నారని, దానిపై స్పీకర్​నిర్ణయం తీసుకుంటారన్నారు.

దళితుల సహకారంతోనే ఎదిగాను: నర్సారెడ్డి

గజ్వేల్​జరిగిన అంశంలో తన వివరణ కోరుతూ నోటీసులు ఇచ్చారని, త్వరలోనే జవాబు ఇస్తానని సిద్దిపేట డీసీసీ అధ్యక్షుడు నర్సారెడ్డి చెప్పారు. గజ్వేల్​సమావేశంలో ప్రోటోకాల్​పాటించకుండా వేదిక ఎక్కితే తమ కార్యకర్తలు వేదిక దగ్గర అబ్యంతరం చెప్పారన్నారు. అంతే తప్ప తాను దళితలకు వ్యతిరేకంగా వ్యవహరించలేదన్నారు. తన నియోజకవర్గంలో జనరల్ కేటగిరి ప్రాంతాల్లో కూడా దళితులకు పదవులు ఇచ్చానని నర్సారెడ్డి చెప్పారు. తాను దళితుల సహకారంతో ఈ స్థాయికి వచ్చానని చెప్పారు. తనకు స్థానికంగా ఉన్న ఇద్దరు, ముగ్గరు నేతలకు పడటం లేదన్నారు. గత ఎన్నికల్లో బీజేపీ నుంచి పోటీ చేసిన ఈటల రాజేందర్​ని తనపై ఫిర్యాదు చేసిన నేత ఇంటికి ఆహ్వానించారని, శాలువా కప్పి, పటాకులు కాల్చారని నర్సారెడ్డి ఆరోపించారు. మేము కూడా ఈ అంశాన్ని అధిష్టానం దృష్టికి తీసుకువెళ్ళామన్నారు.