పేద, మధ్య తరగతికి పెద్ద ఊరట.. కొత్త బీమా పథకం: 1.15 కోటి కుటుంబాలకు లాభం

దిశ, తెలంగాణ బ్యూరో: రాష్ట్ర ప్రజలకు కాంగ్రెస్ సర్కార్ గుడ్ న్యూస్ చెప్పింది. రాష్ట్రంలోని ఒక కోటి 15 లక్షల కుటుంబాలకు.. రూ.5 లక్షల జీవిత బీమా పథకం అమలు చేయబోతున్నట్లు బడ్జెట్ లో ప్రకటించారు. ఈ ఏడాది జూన్ 2వ తేదీ నుంచి ఇందిరమ్మ కుటుంబ బీమా పథకం అమల్లోకి వస్తుందని డిఫ్యూటీ సీఎం భట్టి విక్రమార్క వెల్లడించారు. ఈ పథకం కోసం రూ. 4వేల కోట్లను కేటాయించారు. రాష్ట్రంలోని ప్రతి కుటుంబానికి ఇది వరం అని.. తెలంగాణలో పుట్టటం.. జీవించటం అనేది వరం అనే విధంగా ప్రభుత్వం ఈ బీమా పథకాన్ని తీసుకొస్తున్నట్లు ఉప ముఖ్యమంత్రి పేర్కొన్నారు. ప్రతి కుటుంబానికి ప్రభుత్వం భరోసా.. ప్రభుత్వం భద్రత కల్పించటానే ఉద్దేశంతో ఈ పథకం తీసుకొస్తున్నట్లు తెలిపారు. కుటుంబంలో సంపాదించే వ్యక్తి దురదృష్టవశాత్తు.. ఆకస్మికంగా దూరమైతే.. ఆ కుటుంబం వీధిన పడకుండా ఈ బీమా ఆదుకుంటుందని పేర్కొన్నారు. రాష్ట్రంలోని ప్రతి కుటుంబానికి భద్రత, భరోసా కల్పిస్తున్న ఏకైక ప్రభుత్వం కాంగ్రెస్ ప్రభుత్వమని అన్నారు.

ప్రపంచంలో ఇలాంటి పథకాన్ని తీసుకురాలే..

విపత్కర పరిస్థితుల్లో కుటుంబాన్ని పోషించే వ్యక్తి దూరమైతే ఆ కుటుంబం వేదన అంతా ఇంతా కాదు.. ఇదే సమయంలో ఆర్థిక భారంతో ఆ కుటుంబం రోడ్డున పడకూడదనే ఉద్దేశంతో.. ఇందిరమ్మ కుటుంబ జీవిత బీమా పథకం అమల్లోకి తీసుకువస్తున్నట్లు భట్టి తెలిపారు. ప్రపంచంలోనే ఇలాంటి పథకాన్ని ఏ దేశం.. ఏ ప్రభుత్వం తీసుకురాలేదని.. ఎవరికీ ఇంత వరకు సాధ్యం కాలేదని.. ఇలాంటి మహత్తరమైన జీవిత బీమా పథకాన్ని తీసుకొచ్చిన ఘనత కాంగ్రెస్ ప్రభుత్వానికే దక్కుతుందన్నారు. సామాజిక అంతరాలతో సంబంధం లేకుండా.. పేద, మధ్య తరగతి అనే వ్యత్యాసం లేకుండా ఈ పథకాన్ని అమలు చేయబోతున్నామని వెల్లడించారు. కాగా ఈ పథకం రాష్ట్రంలోని 1.15 కోట్ల కుటుంబాలకు కుటుంబ పెద్దకు బీమా వర్తిస్తుందని తెలిపారు. కాగా ఈ పథకం ప్రారంభంతో రాష్ట్రంలో ఇప్పటికే ఉన్న రైతు బీమా, చేనేత బీమా వంటి ప్రమాద బీమా పథకాలు రద్దు కానున్నాయి.