దళితుల హక్కుల సాధన కోసం పోరాటానికి సిద్ధం కావాలి

దిశ,నస్పూర్ : దళితుల హక్కుల సాధన కోసం మరో పోరాటానికి సిద్ధం కావాలని మాదిగ హక్కుల దండోరా రాష్ట్ర అధ్యక్షుడు రేగుంట సునీల్ అన్నారు. శుక్రవారం నస్పూర్ పట్టణంలోని సీసీ సెంటర్ లో డాక్టర్ బాబాసాహెబ్ అంబేద్కర్ విగ్రహానికి ఆయన పాలాభిషేకం చేసి పూలమాలలు సమర్పించారు. అనంతరం ఆయన మాట్లాడారు. ఉమ్మడి రాష్ట్రంలో వెనుకబడ్డ మాదిగలు, అణగారిన వర్గాల ప్రజల త్యాగాల పునాదుల మీద ఏర్పడ్డ స్వరాష్ట్రంలో మరింత అనగదొక్కబడుతున్నారని, దళితులను అభివృద్ధి చేయాల్సిన బాధ్యత తెలంగాణ ప్రభుత్వం పై ఉన్నదని అన్నారు.

తెలంగాణ రాష్ట్రం కోసం జరిగిన పోరాటంలో దళితుల పాత్ర మరువలేనిదని, అలాంటి దళితులకు అడుగడుగునా అన్యాయమే జరుగుతుందని, దగా పడిన దళితుల హక్కుల సాధన కోసం మరో పోరాటానికి సిద్ధం కావాలని పిలుపునిచ్చారు. ఈ కార్యక్రమంలో ఎంహెచ్డీ మంచిర్యాల జిల్లా అధ్యక్షుడు కడారి రమేష్, నస్పూర్ పట్టణ అధ్యక్షుడు అటుకపురం సమ్మయ్య, నాయకులు కొండ్ర లింగయ్య, రేగుంట లింగయ్య,కొండ్ర ఉదయ్, అటుకపురం రాజలింగు పాల్గొన్నారు.