ఆవిర్భావ దినోత్సవం వేళ.. తెలంగాణ ఉద్యమకారుల నిరసన

దిశ,మహబూబాబాద్ ప్రతినిధి : తెలంగాణ రాష్ట్ర అవతరణ దినోత్సవాన్ని ప్రభుత్వం అంగరంగ వైభవంగా నిర్వహిస్తున్న క్రమంలో మహబూబాబాద్ జిల్లాలో తెలంగాణ ఉద్యమకారులు ప్రభుత్వంపై తమ నిరసన గళాన్ని వినిపించారు. శుక్రవారం జిల్లా కేంద్రంలోని అంబేడ్కర్ సెంటర్‌లో ప్లకార్డులు చేతపట్టుకొని నినాదాలు చేశారు. రాష్ట్రం ఏర్పాటై 10 ఏండ్లు గడుస్తున్నా తెలంగాణ ఉద్యమకారులకు గుర్తింపు లేదని ఆవేదన వ్యక్తం చేశారు. ఈ సందర్భంగా పలువురు ఉద్యమ నాయకులు మాట్లాడుతూ.. తెలంగాణ ఉద్యమంలో వయస్సు, చదువు, సమయాన్ని వృథా చేసుకొని రోడ్డున పడ్డ ఉద్యమకారులు ఉన్నారని అన్నారు. ప్రతి తెలంగాణ ఉద్యమకారునికి ప్రభుత్వ సంక్షేమ పథకాలను వర్తింపజేయాలని, అర్హులైన వారిని ప్రభుత్వ ఉద్యోగులుగా గుర్తించి, పెన్షన్ విధానం అమలు చేయాలని డిమాండ్ చేశారు. తెలంగాణ ఉద్యమకారులు తెలంగాణలో అవమానాలకు గురవుతున్నారని ఆవేదన వ్యక్తంచేశారు.