శ్రీలంక అధ్యక్ష భవనంలో 40 కళాఖండాలు మాయం

కొలంబో: శ్రీలంక అధ్యక్ష భవనంలో దొంగిలించిన కళాఖండాలను సోమవారం పోలీసులు స్వాధీనం చేసుకున్నారు. మార్కెట్‌లో బంగారం పూతతో తయారు చేసిన 40 కళాఖండాలను అమ్ముతున్న క్రమంలో పోలీసులు ముగ్గురు దొంగలను అడ్డుకుని వారిని అరెస్ట్ చేశారు. ఈ మేరకు పెయింటింగ్స్‌లను పురావస్తు శాఖకు తరలించారు. కాగా, ఇటీవల శ్రీలంక దేశంలో ఆర్థిక, రాజకీయ సంక్షోభం ఏర్పడిన విషయం తెలిసిందే. శ్రీలంక అధ్యక్షుడు రాజీనామా చేయాలని జులై 9వ తేదీన నిరసనకారులు భారీ ఎత్తున ఆందోళన చేపట్టారు. ఆ క్రమంలో మాజీ అధ్యక్షుడు గొటబయ రాజపక్సాతోపాటు మాజీ ప్రధాని రణిల్ విక్రమ సింఘే నివాసాల్లోకి దూసుకెళ్లారు. కొద్ది రోజులపాటు అక్కడే ఉండి జల్సాలు చేశారు. అలాగే స్థానికంగా ఉన్న వస్తువులు, సామగ్రిలను ధ్వంసం చేయడం.. నిప్పంటించడం వంటి పనులు చేశారు. ఈ క్రమంలో అధ్యక్ష భవనంలో ఉన్న 1000కిపైగా కళాఖండాలను కొందరు దొంగలు దొంగిలించారు. ఈ వ్యవహారంపై శ్రీలంక ప్రభుత్వం పూర్తి స్థాయి దర్యాప్తు చేపట్టేందుకు స్పెషల్ టీమ్‌ను ఏర్పాటు చేసింది. ఈ క్రమంలో సోమవారం నిరసనలో పాల్గొన్న ముగ్గురు వ్యక్తులు బంగారం పూతతో తయారు చేసిన 40 కళాఖండాలను అమ్ముతున్నట్లు పోలీసులకు సమాచారం అందింది. ఈ మేరకు పోలీసులు వారిని అడ్డుకుని అరెస్ట్ చేశారు. ఈ ముగ్గురు దొంగలు రాజగిరియలోని ఓబేశేఖరపురకు చెందిన వారిగా పోలీసులు గుర్తించారు. అలాగే వీరు డ్రగ్స్‌కు బానిసలుగా పోలీసులు అనుమానిస్తున్నారు. విచారణకు కొలంబో క్రిమినల్ ఇన్వెస్టిగేషన్ విభాగానికి కేసును అప్పగిస్తున్నట్లు పోలీసులు తెలిపారు. కాగా ఈ ఘటనపై గతంలో శ్రీలంక నూతన అధ్యక్షుడు రణిల్ విక్రమ సింఘే స్పందించారు. ప్రభుత్వ అధికార భవనాలు, పార్లమెంట్‌ను ముట్టడి చేయడం వంటి చర్యలకు పాల్పడితే కఠిన చర్యలు తీసుకుంటామన్నారు. ఆందోళనకారులను అడ్డుకునేందుకు సాయుధ బలగాలు, పోలీసులకు అన్ని అధికారాలు ఇచ్చామన్నారు.