ఉక్రెయిన్‌పై యుద్ధంలో రష్యాకు బంపర్ ఆఫర్ ఇచ్చిన నార్త్ కొరియా!
దిశ, వెబ్‌డెస్క్ః రష్యా-ఉక్రెయిన్ యుద్ధంతో ప్ర‌పంచ‌వ్యాప్తంగా ప‌లు దేశాల్లో తీవ్ర పరిణామాలు చోటుచేసుకున్నాయి. పేద, ధ‌నిక దేశాల‌నే తేడా లేకుండా ఈ ప్ర‌భావం పడింది. ఈ క్ర‌మంలో ప‌శ్చిమ దేశాలు రష్యాకు వ్యతిరేకంగా ప్ర‌చారం చేస్తుంటే, కొన్ని దేశాలు రష్యాకు ప‌రోక్షంగా స‌హ‌క‌రిస్తున్నాయి. అయితే, తాజాగా నార్త్ కొరియా రష్యాకు మ‌ద్ద‌తుగా ఓ బంపర్ ఆఫ‌ర్‌ను ఇచ్చిన‌ట్లు రష్యా ప్రభుత్వ మీడియా ప్ర‌క‌టించింది. నివేదిక ప్రకారం, ఉక్రెయిన్‌పై రష్యా దండయాత్ర చేసే అవకాశాలను పెంపొందించడానికి నార్త్ కొరియా 100,000 "స్వచ్ఛంద" దళాలను అందించిన‌ట్లు స‌మాచారం. "ల‌క్ష మంది ఉత్తర కొరియా వాలంటీర్లు వచ్చి యుద్ధంలో పాల్గొనడానికి సిద్ధంగా ఉన్నారు" అని రష్యా రక్షణ విశ్లేషకుడు ఇగోర్ కొరోట్చెంకో రష్యన్ ఛానల్ వన్‌తో చెప్పిన‌ట్లు న్యూయార్క్ పోస్ట్ నివేదించింది. "ఉక్రేనియన్ ఫాసిజానికి వ్యతిరేకంగా పోరాడటానికి ఉత్తర కొరియా తన అంతర్జాతీయ కర్తవ్యాన్ని నెరవేర్చాలనే కోరికను వ్యక్తం చేస్తే, మేము వారిని అనుమతించాలి" అని కొరోట్చెంకో వెల్ల‌డించిన్నట్లు నివేదిక పేర్కొంది.
అయితే, యుద్ధంలో పాల్గొంటున్న అనేక రష్యన్ రాష్ట్రాలు "వాలెంటీర్‌" బలగాలే అని ప‌లు నివేదికలు వెలువడిన కొద్ది రోజుల తర్వాత కొరోట్చెంకో ఈ వ్యాఖ్యలు చేయడం ఆసక్తికరంగా మారింది. యుద్ధంలో స‌హ‌క‌రించ‌డానికి భారీ సమీకరణ కోసం ఆదేశించడానికి రష్యా అధ్య‌క్షుడు వ్లాదిమిర్ పుతిన్ ద‌గ్గ‌ర రాజకీయ మూలధనం లేదని కొంద‌రు విశ్లేష‌కులు భావిస్తున్నారు. గత నెలలో, UK MI6 చీఫ్ రిచర్డ్ మూర్ మాట్లాడుతూ, రష్యా యుద్ధ ప్రయత్నం "ఆవిరి అయిపోతుంది" అని అన్నారు. కొలరాడోలోని ఆస్పెన్ సెక్యూరిటీ ఫోరమ్‌లో జరిగిన ప్రశ్నోత్తరాల సెషన్‌లో, "రాబోయే కొన్ని వారాల్లో మానవశక్తి , మెటీరియల్‌ను సరఫరా చేయడం రష్యన్‌లకు చాలా కష్టమవుతుందని మా అంచనా" అని అన్నారు.
ఇక, న్యూయార్క్‌లోని కౌన్సిల్ ఫర్ ఫారిన్ రిలేషన్స్ ప్రకారం, ఉత్తర కొరియా సైన్యం దాదాపు 1.3 మిలియన్ల క్రియాశీల సిబ్బందితో ప్రపంచంలో నాల్గవ అతిపెద్దదిగా ఉంది. ఇది రిజర్వ్ సైనికులుగా ఇంకా 600,000 మంది సిబ్బందిని కలిగి ఉందని స‌మాచారం. అయితే, CFPలోని రక్షణ నిపుణుల అభిప్రాయం ప్రకారం, ఉత్తర కొరియా పాత‌బ‌డిన పరికరాలు, సాంకేతికతతో పనిచేస్తుంది. యుద్ధానంతర ఉక్రెయిన్‌ను పునర్నిర్మించడంలో రష్యాకు సహాయం చేయడానికి ఉత్తర కొరియా కార్మికులను కూడా ఆఫర్ చేసిందని దక్షిణ కొరియా వార్తాపత్రిక డైలీ ఎన్‌కె నివేదించింది. రష్యా యుద్ధంలో గెలిస్తే తూర్పు ఉక్రెయిన్‌లోని డాన్‌బాస్ ప్రాంతానికి 1,000 మందికి పైగా కార్మికులను పంపాలని కిమ్ జోంగ్-ఉన్ యోచిస్తున్నట్లు రష్యా నివేదిక‌ల‌ను ఉటంకిస్తూ వార్తాపత్రిక నివేదించింది.
