మహాత్ముడు ప్రారంభించిన ఆ మహత్తర ఉద్యమానికి 92 ఏళ్లు!

దిశ, ఫీచర్: భారతదేశంలో బ్రిటీష్ పాలనకు వ్యతిరేకంగా జరిగిన శాసనోల్లంఘనలో భాగంగా భారత జాతీయ కాంగ్రెస్ జరిపిన అహింసా ఉద్యమమే ఉప్పు సత్యాగ్రహం. మహాత్మాగాంధీ నేతృత్వంలో 1930 మార్చి 12న, 79 మంది సత్యాగ్రహ వాలంటీర్లతో సబర్మతీ ఆశ్రమం నుంచి మొదలైన ఈ యాత్ర 24 రోజుల తర్వాత 1930 ఏప్రిల్ 6న దండి వద్ద ముగిసింది. మొత్తం 384 కి.మీ. దూరం వేల మంది సత్యాగ్రహులతో కొనసాగిన ఈ పాదయాత్రకు గుజరాత్ తీరంలోని దండి వద్ద ఉప్పు తయారుచేసి ముగింపు పలికారు. అంతేకాదు ఈ యాత్ర కోట్లాది భారతీయులు బ్రిటీష్ ప్రభుత్వానికి వ్యతిరేకంగా పెద్ద ఎత్తున శాసనోల్లంఘన ఉద్యమంలో పాల్గొనడానికి స్ఫూర్తినిచ్చింది.