ఫిలిప్పీన్స్‌ను వెంటాడుతున్న సునామీ భయం

దిశ, వెబ్ డెస్క్ : ఫిలిప్పీన్స్‌లో సోమవారం సంభవించిన భారీ భూకంపంతో, ప్రస్తుతం ఆ దీవిని సునామీ భయం వెంటాడుతోంది. ఫిలిప్పీన్స్‌లోని మిండనావో (Mindanao) తీర ప్రాంతంలో రిక్టర్ స్కేలుపై 7.8 తీవ్రతతో అత్యంత శక్తివంతమైన భూకంపం సంభవించింది. సరంగాని ప్రావిన్స్ సమీపంలో, తీరం నుండి సుమారు 26 కిలోమీటర్ల దూరంలో భూకంప కేంద్రం నమోదైనట్లు అధికారులు గుర్తించారు. ఈ భారీ భూకంపం కారణంగా సముద్రపు అలలు ఉవ్వెత్తున ఎగసిపడే ప్రమాదం ఉండటంతో ఫిలిప్పైన్స్‌తో పాటు పొరుగు దేశాలైన ఇండోనేషియా, మలేషియా తీర ప్రాంతాల్లో కూడా తక్షణమే సునామీ హెచ్చరికలు జారీ చేశారు. ప్రస్తుతానికి సునామీ భయం తగ్గినప్పటికీ, ఈ భూకంపం మిండనావో ప్రాంతంలో భారీ వినాశనాన్ని మిగిల్చింది. తాజా నివేదికల ప్రకారం ఈ ప్రకృతి వైపరీత్యం వల్ల 32 నుంచి 37 మంది వరకు మరణించగా, వందలాది మంది తీవ్రంగా గాయపడ్డారు. భూకంప ధాటికి అనేక భవనాలు కుప్పకూలాయి, మరికొన్ని ప్రాంతాల్లో కొండచరియలు (Landslides) విరిగిపడటంతో రవాణా వ్యవస్థ స్తంభించింది. ఇళ్లు కోల్పోయి వేలాది మంది ప్రజలు నిరాశ్రయులయ్యారు. ప్రస్తుతం ఫిలిప్పీన్స్‌ అధ్యక్షుడు ఫెర్డినాండ్ మార్కోస్ స్వయంగా రంగంలోకి దిగి అక్కడ జరుగుతున్న సహాయక చర్యలను పర్యవేక్షిస్తున్నారు. ప్రభావిత ప్రాంతాల్లో రెస్క్యూ ఆపరేషన్లు ముమ్మరంగా సాగుతున్నప్పటికీ, వరుసగా వస్తున్న భూప్రకంపనలు స్థానిక ప్రజలను ఇంకా భయాందోళనలకు గురిచేస్తూనే ఉన్నాయి.