మాకేం తెల్వదు.. మంత్రి హత్య కుట్ర కేసులో నోరు విప్పని నిందితులు

దిశ, తెలంగాణ బ్యూరో : మంత్రి శ్రీనివాస్ గౌడ్ హత్యకు కుట్ర కేసులో ఏడుగురు నిందితుల విచారణ కొనసాగుతోంది. గురువారం పేట్ బషీరాబాద్ పోలీసులు రెండవ రోజు కస్టడీలోకి తీసుకున్నారు. చర్లపల్లి జైలు నుంచి వైద్య పరీక్షల అనంతరం నిందితులను పోలీస్ స్టేషన్‌కు తరలించారు. మేడ్చల్​ కోర్టు ఆదేశాలతో వారిని వీడియో రికార్డింగ్​ చేస్తూ విచారణ చేస్తున్నారు.

కాగా, విచారణ సందర్భంగా నిందితుల నుంచి ఒకే సమాధానం వస్తున్నట్లు తేలింది. మంత్రి హత్య కుట్రలో తమకేం సంబంధం లేదని, ఆ స్థాయి కూడా లేదని వెల్లడించినట్లు సమాచారం. కానీ, మంత్రి శ్రీనివాస్​గౌడ్​, ఆయన తమ్ముడు శ్రీకాంత్​ గౌడ్​ కారణంగా తాము అన్ని విధాల నష్టపోయినట్లు పోలీసుల విచారణలో వెల్లడించారు.

మరోవైపు మంత్రిని హత్యకు రూ. 15 కోట్ల సుఫారీ ఇచ్చే ఆర్థిక స్థోమత కూడా లేదని పోలీసుల విచారణలో చెప్పినట్లు తెలుస్తోంది. ఈ కేసులో ఇప్పటికే చాలా అనుమానాలు వ్యక్తమవుతున్న నేపథ్యంలో నిందితుల విచారణపై ఆసక్తి నెలకొంది. పోలీసు వర్గాల నుంచి మాత్రం ఎటువంటి వివరాలు బయటకు వెల్లడించలేదు. అంతేకాకుండా నిందితుల తరలింపుపై కూడా చాలా జాగ్రత్తలు తీసుకుంటున్నారు. ఈ నెల 13 వరకూ నిందితుల కస్టడీ కొనసాగనుంది.