సాధారణ ప్రసవాలకు' ఇన్సెంటివ్'​లు.. ఒక్కో డెలివరీకి రూ.3 వేలు

దిశ, తెలంగాణ బ్యూరో: నార్మల్​ డెలివరీలు నిర్వహించినందుకు వెంటనే ఇన్సెంటివ్​లు ఇవ్వాలని ప్రభుత్వం నిర్ణయించింది. ఒక్కో డెలివరీకి రూ. 3 వేల చొప్పున ఇవ్వాలని శుక్రవారం హెల్త్​ సెక్రటరీ రిజ్వీ జీవో జారీ చేశారు. ప్రభుత్వం ఇచ్చే పారితోషికాన్ని డాక్టర్​ నుంచి శానిటేషన్​ స్టాఫ్​వరకు పంపిణీ చేయనున్నారు. గైనకాలజిస్ట్ /మెడికల్​ ఆఫీసర్​కు రూ. వెయ్యి, మిడ్​వైఫ్​/స్టాఫ్​నర్సు/ఏఎన్​ఎంల కు రూ వెయ్యి, ఆయా/శానిటేషన్​ వర్కర్లకు రూ. 500, సబ్​సెంటర్​ ఏఎన్​ఎంకు రూ. 250, ఆశాకు రూ. 250 చొప్పున పంపిణీ చేయనున్నారు. ఈ ఇన్సెంటివ్​లను నేషనల్​ హెల్త్​ మిషన్​నిధుల నుంచి ఇవ్వనున్నారు. అయితే కనీసం ప్రతి నెల టీచింగ్ ​ఆసుపత్రుల్లో 350, డిస్ట్రిక్ట్, ఎంసీహెచ్​ సెంటర్లకు 250, ఏరియా ఆసుపత్రుల్లో 150, సీహెచ్​ సీల్లో 50, 24 గంటల పీహెచ్​ సీల్లో 10, సాధారణ పీహెచ్​ సీల్లో 5 డెలివరీలు చొప్పున జరగాలని, అప్పుడే ఇన్సెంటివ్​లకు టీమ్​లను సెలెక్ట్​ చేస్తామని సర్కార్ ​జీవోలో పేర్కొన్నది. ప్రభుత్వం తీసుకున్న ఈ నిర్ణయంతో నార్మల్​ డెలివరీలు పెరిగే అవకాశం ఉన్నదని ఆఫీసర్లు అభిప్రాయాన్ని వ్యక్తం చేస్తున్నారు.