కాంగ్రెస్‌లోకి ఎమ్మెల్సీ కసిరెడ్డి.. రేవంత్ ఇచ్చిన హామీ ఇదే!
దిశ, రంగారెడ్డి బ్యూరో: ఎన్నికల సమీపిస్తున్న తరుణంలో కల్వకుర్తి నియోజకవర్గంలో రాజకీయం రసవత్తరంగా మారుతుంది. మొన్నటి వరకు అధికార పార్టీ బీఆర్ఎస్‌లో టికెట్దక్కుతుందని ఆశించిన ఎమ్మెల్సీ కసిరెడ్డికి భంగపాటు కలిగింది. దీంతో తమ అనుచరులు ఈ దఫా ఎన్నికల్లో ఎమ్మెల్యేగా పోటీ చేయాల్సిందేనంటూ కసిరెడ్డిపై ఒత్తిడి పెంచుతున్నారు. ఈ నేపథ్యంలో అధిష్టానం కసిరెడ్డితో చర్చలు జరిపినప్పటికీ క్షేత్రస్థాయిలోని కార్యకర్తలు మాత్రం వెనక్కి తగ్గని పరిస్థితి కనిపిస్తోంది. ఈ విషయాన్ని పసిగట్టిన కాంగ్రెస్పార్టీ స్థానిక మాజీ ఎమ్మెల్యే, సీడబ్ల్యూసీ ఆహ్వానితులు వంశీచంద్ రెడ్డి, పీసీసీ అధ్యక్షులు రేవంత్రెడ్డిలు ఎమ్మెల్సీ కసిరెడ్డి నారాయణరెడ్డిని పార్టీలోకి తీసుకొచ్చేందుకు ప్రయత్నాలు కొనసాగించారు. అందులో భాగంగానే ఎమ్మెల్సీ కసిరెడ్డి నారాయణరెడ్డికి ఢిల్లీ పెద్దల నుంచి కల్వకుర్తి అసెంబ్లీ టికెట్ ఇచ్చేందుకు హామీ ఇచ్చినట్లు తెలుస్తోంది.
అయితే ఈ స్థానం నుంచి వంశీచంద్రెడ్డి పోటీ చేయాల్సి ఉన్నప్పటికీ సీడబ్లూసీలో ప్రత్యేక ఆహ్వానితులుగా ఉండటంతో ఆయన సేవలు పార్టీ వినియోగించుకోవాలని అనుకుటుంది. అందుకోసం ఆ నియోజకవర్గంలో గెలుపు లక్ష్యంగా అభ్యర్థిని గుర్తించి కసిరెడ్డి నారాయణరెడ్డిని పార్టీలోకి ఆహ్వానిస్తున్నట్లు సమాచారం. మరోసారి కసిరెడ్డి తమ అనుచరులతో ప్రత్యేక సమావేశాలు ఏర్పాటు చేసి పార్టీ మారేందుకు రంగం సిద్ధం చేసుకుంటున్నట్లు తెలుస్తోంది. అధికార బీఆర్ఎస్పార్టీ ఇప్పటికే అభ్యర్థిని ప్రకటించడంతో ఆ పార్టీలో కసిరెడ్డికి అవకాశం లేదు. ఒకవేళ పార్టీ బుజ్జగించిన ఫలితం ఉండదని తెలుస్తోంది. ఏది ఏమైనా కల్వకుర్తి అసెంబ్లీ నుంచి కసిరెడ్డి నారాయణ రెడ్డి కాంగ్రెస్ అభ్యర్థిగా ఉండటం ఖాయంగా కనిపిస్తోంది. ఈనెల 29వ తేదీన ఎమ్మెల్సీ కసిరెడ్డి నారాయణరెడ్డి ఢిల్లీ కాంగ్రెస్పెద్దల సమక్షంలో చేరుతున్నట్లు జోరుగా ప్రచారం సాగుతుంది. కసిరెడ్డి నారాయణరెడ్డి కారును వీడి కాంగ్రెస్‌లో చేరితే అధికార పార్టీకి గట్టి దెబ్బ తగలడం ఖాయంగా కనిపిస్తోంది. ప్రస్తుతం స్థానిక సంస్థల ఎమ్మెల్సీగా బాధ్యతలు నిర్వహిస్తున్న నేపథ్యంలో ఉమ్మడి మహాబూబ్నగర్ జిల్లాపై కసిరెడ్డి ప్రభావం భారీగా ఉండే అవకాశాలు కనిపిస్తున్నాయి.
