ఐఐటీ, నీట్, క్లాట్ లక్ష్యంగా కేజీబీవీల్లో ప్రత్యేక కోచింగ్ హబ్‌లు

​దిశ, తెలంగాణ బ్యూరో: గ్రామీణ, వెనుకబడిన ప్రాంతాలకు చెందిన ప్రతిభావంతులైన విద్యార్థినులను జాతీయ స్థాయి పోటీ పరీక్షల్లో విజేతలుగా నిలపాలనే లక్ష్యంతో ప్రభుత్వం రాష్ట్ర వ్యాప్తంగా ఎంపిక చేసిన 93 కస్తూర్బా గాంధీ బాలికా విద్యాలయాల్లో యంగ్ ఇండియా ఇన్‌స్టిట్యూట్ ఆఫ్ ఎక్సలెన్స్‌లను ఏర్పాటు చేసింది. ఈ కేంద్రాల ద్వారా విద్యార్థినులకు ఉన్నత ప్రమాణాలతో కూడిన కోచింగ్, విద్యాపరమైన తోడ్పాటును ప్రభుత్వం అందిస్తుంది. ​ప్రస్తుతం వేసవి సెలవుల్లో కూడా ఆయా కేంద్రాల్లో ప్రత్యేక శిక్షణ కొనసాగుతోంది. ​ఐఐటీ-జేఈఈ శిక్షణలో హనుమకొండ జిల్లా కమలాపూర్ కేజీబీవీలో 140 మంది, ​నీట్ కోచింగ్‌లో యాదాద్రి జిల్లా బొమ్మలరామారం కేజీబీవీలో 146 మంది, క్లాట్ కోచింగ్ కు రంగారెడ్డి జిల్లా కందుకూరు, కేజీబీవీలో 82 మంది విద్యార్థులకు కోచింగ్ అందిస్తున్నారు. ​

ఫస్ట్ ఇయర్ ఫౌండేషన్ ప్రోగ్రాంలో భాగంగా ఎంపీసీ స్ట్రీమ్‌లో రంగారెడ్డి జిల్లా పాలమాకుల కేజీబీవీలో 202 మంది, ​బైపీసీ స్ట్రీమ్‌లో జిన్నారం, సంగారెడ్డి 202 మంది, సీఈసీ స్ట్రీమ్‌లో నల్గొండ జిల్లా మునుగోడు కేజీబీవీలో 150 మందికి కోచింగ్ అందిస్తున్నారు. ​ఈ సందర్భంగా స్కూల్ ఎడ్యుకేషన్ డైరెక్టర్ నవీన్ నికోలస్ ఆదివారం యాదాద్రి జిల్లాలోని బొమ్మల రామారం కేజీబీవీని సందర్శించారు. అక్కడ కొనసాగుతున్న నీట్ శిక్షణను పరిశీలించిన ఆయన, ప్రభుత్వం చేపట్టిన ఈ కార్యక్రమం అమలు తీరుపై సంతృప్తి వ్యక్తం చేశారు. ఫ్యాకల్టీ నిబద్ధతను అభినందిస్తూ, విద్యార్థినుల క్రమశిక్షణ, ప్రతిభను కొనియాడారు. ​ఈ సందర్భంగా పకడ్బందీ శిక్షణ కారణంగా రాబోయే పోటీ పరీక్షల్లో విద్యార్థినులు అద్భుతమైన ఫలితాలు సాధిస్తారని ధీమా వ్యక్తం చేశారు.