విషాదం.. షూ కోసం వెళ్లి బావిలో పడిన బాలుడు

దిశ, నర్సాపూర్: బావిలో పడిన షూస్ తీసేందుకు వెళ్లి ఓ బాలుడు మృతి చెందిన సంఘటన నర్సాపూర్ మండలంలో చోటు చేసుకుంది. బ్రాహ్మణపల్లి తండాకు చెందిన వాకుడోత్ అరుణ్ (8) షూ వేసుకొని బావిలో స్నానానికి వెళ్లాడు. షూ బావిలో పడడంతో తీయడానికి వెళ్లి కాలు జారి పడి గల్లంతయ్యాడు. తండావాసులు పోలీసులకు సమాచారం అందించడంతో గాలించి బాలుడి శవాన్ని బయటకు తీశారు. అయితే గత మూడేళ్ల కిందట అరుణ్ తల్లిదండ్రులు మృతి చెందగా, అప్పటి నుంచి తన పెద్ద నాన్న అయినా జయరాం వద్దనే ఉంటున్నాడు. అరుణ్ మృతితో తండాలో విషాదఛాయలు అలుముకున్నాయి. జయరాం ఫిర్యాదుతో కేసు నమోదు చేసి దర్యాప్తు చేస్తున్నట్లు నర్సాపూర్ ఎస్సై శివకుమార్ తెలిపారు.