గజదొంగ ప్రభాకర్ కేసులో కీలక అప్ డేట్స్..
దిశ, శేరిలింగంపల్లి : ప్రిజం పబ్ వద్ద పోలీసులపై ఫైరింగ్ కు దిగిన మోస్ట్ వాంటెడ్ క్రిమినల్ బత్తుల ప్రభాకర్ కేసులో అనేక విషయాలు వెలుగులోకి వస్తున్నాయి. బత్తుల ప్రభాకర్ తో ఎవరెవరికి సంబంధాలు ఉన్నాయి, ఎవరితో ఆర్థిక లావాదేవీలు నడిపాడు. అతనికి సహకరించింది ఎవరు, అతని రూమ్ కు ఎవరెవరు వచ్చిపోయే వారు ఇలా అనేక కోణాల్లో దర్యాప్తు చేస్తున్నారు పోలీసులు. పోలీసులకు చిక్కిన గజదొంగ బత్తుల ప్రభాకర్ తో అంటకాగిన అతని స్నేహితులను ఒక్కొక్కరుగా అరెస్ట్ చేస్తున్నారు. గత శనివారం ప్రిజం పబ్బు వద్ద బత్తుల ప్రభాకర్ ను స్కోడా కారులో డ్రాప్ చేసిన సాఫ్ట్వేర్ ఉద్యోగి రంజిత్ ను అడుపులోకి తీసుకున్న పోలీసులు అతన్ని విచారించారు. బత్తుల ప్రభాకర్ కు సంబంధించిన పలు కీలక విషయాలను వెల్లడించాడు. రంజిత్ 2023 నుండి ప్రభాకర్ తో సన్నిహితంగా ఉన్నట్లు గుర్తించారు.
ప్రభాకర్ కు ఆశ్రయం కల్పించడంతో పాటు బ్యాంకు లావాదేవీలలో తోడ్పాటు అందించాడు. అంతేకాకుండా ప్రభాకర్ బీహార్ లో వెపన్స్ కొనుగోలు చేసి తీసుకురావడంలో కూడా రంజిత్ సహకరించినట్లు గుర్తించారు. బీహార్ లో ఆయుధాలు కొనుగోలు చేసేందుకు ప్రభాకర్ తో పాటు వెళ్లిన రంజిత్ వెళ్లాడని తేల్చారు. ప్రభాకర్ చోరీ చేసిన డబ్బులను రంజిత్ బ్యాంకు ఖాతాలో వేసుకుని వాడుకునేవాడు. ఆర్థిక లావాదేవీలన్నీ రంజిత్ అకౌంట్స్ నుంచే నేర్పేవాడని తేలింది. దీంతో ఈ కేసులో రంజిత్ ను A2గా చేర్చి అరెస్ట్ చేసిన గచ్చిబౌలి పోలీసులు అతన్ని అరెస్ట్ చేశారు. రంజిత్ తో పాటు బీహార్ లో ఆశ్రయం కల్పించి వెపన్స్ కొనుగోలు చేసేందుకు సహకరించిన మరో మిత్రుడు రవి ప్రస్తుతం పరారీలో ఉన్నాడు. వెపన్స్ కొనుగోలులో కీలక సూత్రధారిగా బీహార్ కు చెందిన అన్షు కోసం పోలీసులు గాలింపు చేపట్టారు. అలాగే గజదొంగ బత్తుల ప్రభాకర్ తో ఎవరెవరికి సంబంధాలు ఉన్నాయి. ఎక్కడెక్కడ తిరిగాడు అనే కోణంలోనూ పోలీసులు దర్యాప్తు చేస్తున్నారు.
