అందరి చూపు... బాలాపూర్ లడ్డూ వేలం పాట వైపే
దిశ, బడంగ్పేట్ : హైదరాబాద్ లో కదిలే తొలి వినాయకుడు ... బాలాపూర్ గణపతి నిమజ్జన నీరాజన వేడుకలకు సర్వం సన్నద్ధమైంది. 44 వసంతాల బాలాపూర్ గణేష్ వార్షికోత్సవ వేడుకల ముగింపు ఉత్సవాలు,2024 బాలాపూర్ గణేష్ లడ్డూ వేలం పాటలో 31వ సారి బాలాపూర్ లడ్డూ ఎవరికి సొంతం కానుందో .. మరికొన్ని గంటల్లో భవితవ్యం తేలనుంది. 2023లో రూ.27 లక్షలుకు దాసరి దయానంద్ రెడ్డి సొంతం చేసుకున్నారు. కాగా ఈ యేడు జరుగనున్న బాలాపూర్ గణేష్ లడ్డూ వేలం పాట ఎంతో ఆసక్తి రేకెత్తించనుంది. ఈ సారి లడ్డు వేలం పాటకు ఇప్పటివరకు ఐదుగురు వ్యక్తులు మాత్రమే ఒక్కొక్కరు రూ.5వేలు చెల్లించి తమ పేర్లను నమోదు చేసుకున్నారు. ఈసారి లడ్డూ వేలం పాటలో బాలాపూర్ గ్రామస్థులు కూడా ముందుగానే డిపాజిట్ చేశాక లడ్డూ వేలం పాట పాల్గొనడానికి అర్హులని కొత్త రూల్ తీసుకువచ్చిన విషయం విధితమే.
గత సంవత్సరం 2023 జరిగిన వేలం పాటలో మొత్తాన్ని రూ. 27 లక్షల రూపాయలను డిపాజిట్ గా చూపిస్తేనే వేలం పాట పాడడానికి అర్హులుగా పరిగణనలోకి తీసుకుంటారు. ఈ నేపథ్యంలో చివరగా సోమవారం సాయంత్రం 6గంటల వరకు రూ.27లక్షల డిపాజిట్ చెల్లించిన వారికే లడ్డూ వేలం పాట పాల్గొనడానికి అర్హులని బాలాపూర్ గణేష్ ఉత్సవ సమితి అధ్యక్షులు కళ్ళెం నిరంజన్ రెడ్డి తెలిపారు. గత పది రోజులుగా ప్రతి రోజు బాలాపూర్ గణపతిని 30 నుంచి 40 వేల మంది దర్శించుకుంటే సెలవుదినాల్లో మాత్రం 70 నుంచి 80 వేల మంది భక్తులు దర్శించుకున్నట్లు తెలుస్తుంది. ఎప్పుడు లేని విధంగా ఈ యేడు ఇప్పటి వరకు 6 లక్షలకు పైగా భక్తులు బాలాపూర్ గణపతిని దర్శించుకున్నారు.
బాలాపూర్ గ్రామ పురవీధుల గుండా కొనసాగనున్న గణపతి ఊరేగింపు....
44 సంవత్సరాల ఘన చరిత్ర కలిగిన బాలాపూర్ గణపతి నిమజ్జన వేడుకలు మంగళవారం ప్రారంభం కానుంది. తెల్లవారుజామున 5 గంటలకు బాలాపూర్ గణేష్ ఉత్సవ సమితి ఆధ్వర్యంలో గణపతి పూజా కార్యక్రమాలు ప్రారంభం కానున్నాయి. ఉదయం 6.30 గంటల నుంచి బాలాపూర్ పురవీధుల గుండా అత్యంత భక్తి శ్రద్దలతో భజన చేస్తూ .. సన్నాయి మేళాల నడుమ బాలాపూర్ గణపతిని ఊరేగిస్తారు. బాలాపూర్ గ్రామంలో ప్రతి ఇంటి నుంచి సాక పెట్టి , కొబ్బరికాయ కొట్టి, మంగళ హారతులు పడతారు. 9 గంటలకు బాలాపూర్ గణపతి డీసీఎం వ్యాన్లో బొడ్రాయి వద్దకు చేరుకుంటుంది. ఉదయం 9.30 గంటలకు బాలాపూర్ గణేష్ లడ్డూ వేలం పాట అట్టహాసంగా ప్రారంభమవుతుంది. ఆసక్తి గల అభ్యర్థులు వేలం పాటలో పోటా పోటీగా పాడడం కనబడుతుంది. గత ఏడాది లడ్డూను సొంతం చేసుకున్న డబ్బులు చెల్లించిన దాసరి దయానంద్ రెడ్డిని బంగారు గొలుసుతో ఘనంగా సత్కరించనున్నారు.
బాలాపూర్ గణేష్ శోభాయాత్ర లో భారీ పోలీసు బందోబస్తు....
మంగళవారం జరగనున్న బాలాపూర్ గణేష్ నిమజ్జన శోభ యాత్రకు ఎలాంటి ఇబ్బందులు కలగకుండా అన్ని ఏర్పాట్లు చేసినట్లు మహేశ్వరం డీసీపీ సునీతా రెడ్డి తెలిపారు. బాలాపూర్ గణేష్ శోభాయాత్ర వెంట ఒక డీసీపీ, ఒక అడిషనల్ డీసీపీ, నలుగురు ఏసీపీలు, 12 మంది సీఐలు, 26 మంది ఎస్ఐలు, 208 మంది పోలీసు సిబ్బందితో పాటు రాపిడ్యాక్షన్ ఫోర్స్తో పాటు పారామిలటరీ బలగాలు, స్పెషల్ పార్టీ పోలీసులు బందోబస్తులో పాల్గొంటారన్నారు. 30 సి.సి కెమెరాలతో బందోబస్తును పర్యవేక్షిస్తామన్నారు.
