వాట్సాప్‌లో అందుబాటులోకి వచ్చిన ఛానెల్స్ ఫీచర్
దిశ, వెబ్‌డెస్క్: మెసేజింగ్ దిగ్గజం వాట్సాప్ ఇటీవల కాలంలో వరుసగా కొత్త ఫీచర్లను తీసుకొస్తుంది. ఇంతకుముందు ఛానెల్స్ అనే ఫీచర్‌ను తెస్తున్నట్లు ప్రకటించిన కంపెనీ తాజాగా ఈ ఫీచర్‌ను ప్రపంచదేశాలతో పాటు ఇండియాలో అందరికి అందుబాటులోకి తెచ్చింది. వాట్సాప్ యాప్‌లో స్టేటస్ ఆప్షన్‌ విభాగంలో కొత్తగా అప్‌డేట్స్ అని కనిపిస్తుంది. దాని క్రింద స్టేటస్‌లతో పాటు ఛానెల్స్‌ను అందించారు.
దిగ్గజ సెలబ్రిటీల నుంచి మొదలుకుని సాధారణ ప్రజలు కూడా ఛానెల్స్‌ను క్రియేట్ చేసుకోవచ్చు. సినిమా స్టార్స్, క్రికెటర్స్, రాజకీయ నాయకులు, వివిధ కంపెనీలకు చెందిన అధికారులు, వ్యాపారవేత్తలు, మీడియా, ప్రభుత్వ విభాగాలు, ఫుడ్, ట్రావెల్, తదితర అన్ని విభాగాలకు ప్రత్యేకంగా ఛానెల్స్ క్రియేట్ చేసుకోవచ్చు. ఇది అచ్చం టెలిగ్రామ్ మాదిరిగా ఉంటుంది. యూజర్లు కేటగిరీల వారిగా తమకు నచ్చిన విభాగాన్ని ఎంచుకుని ఫాలో కావచ్చు. ఇలా ఫాలో కావడం ద్వారా ఆయా ఛానెల్స్‌లో వచ్చే కంటెంట్‌ను చూడవచ్చు.
ఛానెల్స్‌లో జాయిన్ అయి వారి ఫోన్ నెంబర్లు అవతలి వారికి కనిపించకుండా సెక్యూరిటీని అందించారు. దీనిలో మెసేజ్‌లు అన్ని కూడా ఎండ్-టూ-ఎండ్ ఎన్‌క్రిప్ట్ చేయబడుతాయని కంపెనీ పేర్కొంది. ఈ ఛానెల్స్ ఫీచర్‌ను పొందడానికి యూజర్లు తమ వాట్సాప్‌ను అప్‌డేట్ చేయాల్సి ఉంటుంది. ప్రస్తుతం ఈ ఫీచర్ భారత్‌తో పాటు 150కి పైగా దేశాల్లో అందుబాటులో ఉందని కంపెనీ బ్లాగ్ పోస్ట్‌లో రాసింది.
Read More 2023 Telangana Legislative Assembly election News
For Latest Government Job Notifications
Follow us on Google News
