ఆస్ట్రేలియా చేతిలో భారత్‌కు మరో ఓటమి

దిశ, స్పోర్ట్స్ : ఎఫ్ఐహెచ్ ప్రొ లీగ్ టోర్నీలో భారత పురుషుల హాకీ జట్టు వరుసగా రెండో ఓటమిని చవిచూసింది. రౌర్కెలా వేదికగా శనివారం జరిగిన మ్యాచ్‌లో ఆస్ట్రేలియా చేతిలో 3-0 తేడాతో భారత్ పరాజయం పాలైంది. ఉత్కంఠభరితంగా సాగిన ఈ మ్యాచ్‌లో ఫలితం షూటౌట్‌లో తేలింది. అంతకుముందు నిర్ణీత సమయంలో ఇరు జట్లు 2-2తో సమవుజ్జీలుగా నిలిచాయి. భారత్, ఆసిస్ జట్లు అద్భుతమైన డిఫెన్స్ ప్రదర్శించడంతో తొలి క్వార్టర్ ఒక్క గోల్ కూడా నమోదు కాలేదు. ఆ తర్వాత కెప్టెన్ హర్మన్‌ప్రీత్ 20వ నిమిషంలో గోల్ చేసి భారత్ ఖాతా తెరిచాడు. కాసేపటికే ఆసిస్ తరపున గోవర్స్ బ్లేక్ గోల్ చేసి స్కోరును 1-1తో సమం చేశాడు. అయితే, 29వ నిమిషంలో అమిత్ రోహిదాస్ గోల్ చేయడంతో భారత్ ఫస్టాన్‌ను 2-1తో ఆధిక్యంతో ముగించింది.

ఆ తర్వాత ఆసిస్‌ను నిలువరించిన భారత్.. చివరి వరకూ లీడ్ కాపాడుకునేలా కనిపించింది. అయితే, ఆఖర్లో 53వ నిమిషంలో క్రైయిగ్ టామ్ గోల్ చేయడంతో స్కోరు 2-2తో సమమైంది. ఇక, చివరి 7 నిమిషంలో ఏ జట్టూ గోల్ చేయకపోవడంతో మ్యాచ్ షూటౌట్‌కు వెళ్లింది. అక్కడ ఆస్ట్రేలియా వరుసగా మూడు గోల్స్ చేసి విజేతగా నిలిచింది. మూడు ప్రయత్నాల్లో భారత్ ఒక్క గోల్ కూడా చేయలేకపోయింది. ఈ టోర్నీలో ఆస్ట్రేలియా చేతిలో భారత్‌కు ఇది రెండో ఓటమి. నేడు ఐర్లాండ్‌తో భారత జట్టు తలపడనుంది. ప్రస్తుతం పాయింట్స్ టేబుల్‌లో భారత్ 4వ స్థానంలో కొనసాగుతుంది. నెదర్లాండ్స్ అగ్రస్థానంలో ఉండగా.. ఆస్ట్రేలియా, అర్జెంటీనా వరుసగా రెండు మూడు స్థానాల్లో ఉన్నాయి.