ఎన్నికల వేళ ఆప్ పార్టీకి షాక్ ఇచ్చిన ఈసీ.. మండిపడ్డ అతిషి
దిశ, నేషనల్ బ్యూరో: లోక్‌సభ ఎన్నికల వేళ వరుస షాక్‌లు ఎదుర్కొంటున్న ఆమ్ ఆద్మీ పార్టీకి ఈసీ మరోసారి ఝలక్ ఇచ్చింది. పార్టీ లోక్‌సభ ఎన్నికల ప్రచార గీతమైన 'జైల్ కే జవాబ్ మే హమ్ వోట్ దేంగే' పై ఎన్నికల సంఘం (ఈసీ) నిషేధం విధించింది. దీనిపై పార్టీ నాయకురాలు అతిషి ఆదివారం మండిపడ్డారు. విలేఖరుల సమావేశంలో అతిషి మాట్లాడుతూ ఎన్నికల్లో ప్రతిపక్ష పార్టీలు ప్రచారం చేయకుండా నియంతృత్వ ప్రభుత్వం అడ్డుకుంటుంది. ఈ రోజు మోడీ, బీజేపీ నియంతృత్వానికి నిదర్శనంగా మరో రుజువు వెలుగులోకి వచ్చింది. ఆప్ ప్రచార గీతాన్ని ఎన్నికల సంఘం ద్వారా నిషేధించిందని అన్నారు.
బీజేపీ ప్రతిరోజు ఎన్నికల కోడ్‌ను ఉల్లంఘిస్తుంది, దానిపై ఈసీకి ఎటువంటి అభ్యంతరం ఉండదు. కానీ ఒక ఆప్ నాయకుడు ఊపిరి పీల్చుకుంటే, ఈసీ నుండి నోటీసు వస్తుంది. ఎన్నికల ప్రవర్తనా నియమావళి అమల్లోకి వచ్చిన తర్వాత కూడా బీజేపీ ఈడీ-సీబీఐని దుర్వినియోగం చేసి కేజ్రీవాల్‌ను అరెస్టు చేసినా ఎన్నికల సంఘం మౌనం వహిస్తోంది. కానీ ఈ నియంతృత్వంపై ఎవరైనా పాట రాస్తే, కమిషన్ అప్రమత్తమవుతుందని ఆమె విమర్శలు చేశారు.
పాటలో అధికార పార్టీని, దర్యాప్తు సంస్థలను చెడుగా చూపుతున్నారని ఈసీ పేర్కొంటుంది, కానీ పాటలో బీజేపీని ప్రస్తావించలేదు, అలాగే ఎన్నికల కోడ్‌ను ఉల్లంఘించలేదు. ఇందులో వాస్తవ వీడియోలు, సంఘటనలు ఉన్నాయని ఆమె అన్నారు. కేజ్రీవాల్‌ను అరెస్టు చేసిన నేపథ్యంలో అరెస్టుకు వ్యతిరేకంగా ఎన్నికల్లో ఆప్‌కు ఓటు వేయమని ప్రజలను కోరడానికి ఈ పాటను గురువారం న్యూఢిల్లీలోని పార్టీ ప్రధాన కార్యాలయంలో విడుదల చేశారు.
