హిందీలో కలెక్షన్లు కొల్లగొడుతున్న 'కార్తికేయ 2'

దిశ, సినిమా : యంగ్‌ హీరో నిఖిల్, హీరోయిన్‌ అనుపమ పరమేశ్వరన్ జంటగా నటించిన లేటెస్ట్‌ మూవీ 'కార్తికేయ2'. చందూ మొండేటి దర్శకత్వం వహించిన ఈ సినిమా గత శనివారమే ప్రేక్షకుల ముందుకొచ్చింది. ఈ మేరకు విడుదలైన తొలి షో నుంచే హిట్‌ టాక్‌ తెచ్చుకున్న చిత్రం రెండు తెలుగు రాష్ట్రాలు, బాలీవుడ్‌ సహా యూఎస్‌లోనూ బాక్సాఫీస్‌ను షేక్ చేస్తోంది. ఇక బీటౌన్‌లో విడుదల రోజు కేవలం రూ.7 లక్షలు వసూలు చేయగా.. రోజురోజుకీ కలెక్షన్లు పెరుగుతున్నాయి.

ఈ క్రమంలోనే రెండో రోజు రూ. 28 లక్షలకు, మూడో రోజుకు రూ.1.10 కోట్లు రాబట్టింది. ఈ సందర్భంగా హైదరాబాద్‌లో నిర్వహించిన సక్సెస్ మీట్‌కు ముఖ్య అతిథిగా హాజరైన అల్లు అరవింద్.. 'హిందీలో సరదాగా 50 థియేటర్లలో విడుదల చేస్తే.. రెండో రోజుకు ఆ సంఖ్య 200కి చేరింది. ప్రస్తుతానికి 'కార్తికేయ2' హిందీలో 700 థియేటర్లలో ఆడుతోంది. అంటే ఈ చిత్రం లాంగ్వేజ్ బారియర్స్‌ను అధిగమించి మరీ సత్తా చాటుతోంది' అన్నారు. కాగా తన సినిమాను ఇంత పెద్ద సక్సెస్ చేసినందుకు హీరో నిఖిల్ ప్రేక్షకులకు కృతజ్ఞతలు తెలిపారు.