రైతు రాజ్యం

రైతు దేశానికి కంటి చూపులు

మట్టిలోంచి పత్తి పువ్వు లాంటి

అన్నం మెతుకులు తీసి కాపులు

రబ్బర్ పిలట్ ఏదో ఒకటి

కళ్ళని కుళ్ల పొడిస్తే

పట్టపగలు దేశం

చిమ్మన్ చీకటి అవుతుంది

రైతు దేశానికి వెన్నెముక

చక్కెర పూత చేదు మాత్ర

చప్పరించేందుకు నోరూరిస్తుంది

బ్యాక్ బోన్ను విరగ్గొడితే

దేశం నడవలేక నేల మీద పాకుతుంది

వ్యవసాయానికి ఊతమంటే

మందులు చల్లే కష్టం తీరిందనుకున్నం

ఎవుసందారుల మీద డ్రోన్ల తో

టియర్ గ్యాస్ ను ప్రయోగిస్తారనుకోలేదు

గ్రామ సంపదనుతరలించవచ్చని

నిగనిగలాడే రహదారులు వేశారు

ఆ దారులే ముట్టడికి

ఇప్పుడు దగ్గరి తొవ్వలైనయ్

కార్పొరేట్లకు దేశ సంపదను

పలారంలో పంచి పెట్టవచ్చు

రైతు పంటకు మద్దతు ధర ఇస్తే

దేశం తలకిందులు అవుతుంది

అవును దేశం ఇప్పుడు

తలకిందులు గానే శీర్షాసనం వేసి

అతి గొప్ప ఆర్థిక శక్తిగా నడుస్తుంది

నిరసన వాళ్ళ హక్కు

నిజము వాళ్ళ వాక్కు

ఎద్దు ఏడ్చిన ఎవుసం

రైతు ఏడ్చిన రాజ్యం

ఎన్నటికీ పోగు పోయదు

ఎప్పటికీ బాగుపడదు

-జూకంటి జగన్నాథం

94410 78095