బంగాళాఖాతంలో వాయుగుండం

దిశ, ఏపీ బ్యూరో: ఆగ్నేయ బంగాళాఖాతంలో కొనసాగుతున్న వాయుగుండం 24గంటల్లో తుఫాన్‌గా బలపడనుందని రాష్ట్ర విపత్తుల‌ నిర్వహణ శాఖ కమిషనర్ కె. కన్నబాబు సోమవారం తెలిపారు. దాని ప్రభావంతో రాగల 3రోజుల పాటు దక్షిణ కోస్తా, రాయలసీమలో విస్తారంగా వర్షాలు కురుస్తాయని చెప్పారు. మిగిలిన చోట్ల ఓ మోస్తరు వర్షాలు పడే అవకాశం ఉందన్నారు. తీరం వెంబడి గంటకు 45-65 కిలో మీటర్ల వేగంతో బలమైన గాలులు వీస్తాయని తెలిపారు. సముద్రం అలజడిగా ఉంటుందని, మూడు రోజులపాటు మత్స్యకారులు వేటకు వెళ్లరాదని సూచించారు. ఇప్పటికే ప్రభావిత జిల్లాల అధికారులను అప్రమత్తం చేశామని, తీర ప్రాంత ప్రజలు, లోతట్టు ప్రాంతాలవారు జాగ్రత్తలు తీసుకోవాలని వెల్లడించారు.