అందరి చూపూ.. అయోధ్య వైపే!
కోట్లాది మంది భారతీయుల కల., అయోధ్యలో శ్రీ రామ మందిరం... ఆ కల నెరవేరేందుకు ఇంకొన్ని గంటల సమయం మాత్రమే ఉంది. వాస్తవానికి ఈ రామ మందిరం చాలా ప్రత్యేకం. రాముడి జన్మభూమి గా భావించే చోట, రామ మందిరాన్ని నిర్మించడం కోసం ఎన్నో పోరాటాలు జరిగాయి. మరెన్నో వివాదాలు ఈ ప్రాంతాన్ని చుట్టుముట్టాయి.
ఆధ్యాత్మిక విశ్వనగరి అయోధ్య రామ మందిరం అందంగా ముస్తాబవుతోంది. మరికొన్ని గంటల్లోనే భారతదేశంలోనే అత్యద్భుతమైన రామాలయం ప్రారంభం కానుంది. ఈ చారిత్రాత్మక ఘట్టాన్ని కళ్లారా చూసేందుకు యావత్ ప్రపంచం ఎంతో ఆసక్తిగా ఎదురుచూస్తోంది.
ప్రాణ ప్రతిష్ట అంటే...
సనాతన ధర్మంలో ఏ విగ్రహం అయినా చాలా ముఖ్యమైనదిగా పరిగణించబడుతుంది. అందుకే విగ్రహ ప్రతిష్టాపన సమయంలో ప్రాణ ప్రతిష్ట చేస్తారు. ఏదైనా విగ్రహ ప్రతిష్టాపన సమయంలో ఆ విగ్రహాన్ని సజీవంగా చేసే విధానాన్ని ప్రాణ ప్రతిష్ట అంటారు. ప్రాణం అంటే ప్రాణ శక్తి అని, ప్రతిష్ట అంటే స్థాపన అని అర్థం. ప్రాణ ప్రతిష్ట లేకుండా ఏ విగ్రహం కూడా పూజకు అర్హమైనదిగా పరిగణించబడదు. అందుకే ప్రాణ ప్రతిష్ట ద్వారా విగ్రహంలోకి ప్రాణశక్తి ప్రసరింపబడి, విగ్రహం దేవుడిగా మారుతుందని నమ్ముతారు..
అయోధ్య చారిత్రక పరిణామం...
అయోధ్యను సాకేతపురమని కూడా అంటారు. భారతదేశంలోని అతి పురాతన నగరాలలో ఇది ఒకటి. విష్ణువు శ్రీరాముడిగా అవతరించిన ప్రదేశం కూడా ఇదే. రామాయణ మహాకావ్య ఆవిష్కరణకు మూలం అయోధ్య.. పురావస్తు, సాహిత్య ఆధారాల ప్రకారం, ఈ ఆలయం క్రీస్తు పూర్వం ఐదవ లేదా ఆరవ శతాబ్దానికి చెందినదిగా చెబుతారు. ఈ అందమైన అయోధ్య దేవాలయం ఉత్తరప్రదేశ్ రాష్ట్రంలో సరయు నది ఒడ్డున ఉండటం గమనార్హం. రాబోయే కాలంలో, అయోధ్య ఆలయం మతపరమైన, సాంస్కృతిక ప్రాముఖ్యతకు కేంద్ర బిందువుగా ఉండబోతోంది. యాత్రికులు, చరిత్రకారులు, పర్యాటకులకు స్వర్గధామం. ఈ ఆలయం భారతీయులతో పాటు విదేశీ పర్యాటకులను కూడా ఆకర్షిస్తుంది. భవిష్యత్తులో ఇది మన అతిపెద్ద చారిత్రక చిహ్నంగా మారుతుందనడంలో సందేహం లేదు. ఆలయ వైభవం, దాని చారిత్రక పురాణాలు సందర్శకులను ఎంతగానో ఆకర్షిస్తున్నాయి.
రామ మందిరం లక్షణాలు...
అయోధ్యలో రామ మందిరాన్ని సంప్రదాయ నగర శైలిలో నిర్మించారు. మందిరం పొడవు 380 అడుగులు. వెడల్పు 250 అడుగులు. ఎత్తు 161 అడుగులు. ఆలయంలో మూడంతస్తులు ఉంటాయి. ఒక్కోటి 20 అడుగుల ఎత్తు ఉంటుంది. మొత్తం మీద 392 స్తంభాలు, 44 డోర్లు ఉంటాయి. ప్రధాన గర్భగుడిలో.. శ్రీ రామ్ లల్లా (రాముడి బాల్యం) విగ్రహం ఉంటుంది. మొదటి అంతస్తులో శ్రీ రామ్ దర్బార్ ఉంటుంది. నృత్య, రంగ్, సభా, ప్రార్థన, కీర్తన పేర్లతో ఐదు మండపాలు కూడా నిర్మించారు. ఆలయంలోని స్తంభాలు, గోడలకు దేవుళ్ల విగ్రహాలు, ఇతిహాసాల కథలను. ఏర్పాటు చేశారు. ఆలయం నలుమూలలా.. నాలుగు ఇతర ఆలయాలు ఉంటాయి. అవి.. సూర్యుడు, దేవీ భగవతి, గణేశుడు, శివాలయం. అంతేకాకుండా శ్రీరామ జన్మభూమి కాంప్లెక్స్‌లో మరో 5,6 ఆలయాలు కట్టాలని ప్రతిపాదన ఉంది. ఆలయ నిర్మాణంలో ఒక్క ఇనుప ముక్కను కూడా వాడలేదు. ఎన్ని భూకంపాలు వచ్చినా, ఎన్ని ప్రకృతి విపత్తులు వచ్చినా చెక్కు చెదరకుండా ఉండే విధంగా.. రామ మందిరానికి ఆర్‌సీసీసీ (రోల్ కాంపాక్టెడ్ కాంక్రీట్)తో పునాది వేశారు.
ఈ మందిరం దేవాలయం మాత్రమే కాదు, విశ్వాసం, ఐక్యత, సాంస్కృతిక వారసత్వానికి చిహ్నం. ఆలయ నిర్మాణం భారతదేశ చరిత్రలో ఒక మైలురాయి, ఇది సత్యం, న్యాయం, ధర్మం విజయాన్ని సూచిస్తుంది. ఈ ఆలయం హిందూ సమాజ శాశ్వతమైన స్ఫూర్తికి, రాముడి పట్ల వారి అచంచలమైన భక్తికి నిదర్శనం. ఈ ఆలయం విశ్వాసపు శక్తిని, మానవ ఆత్మ బలాన్ని మనకు గుర్తుచేస్తూ, ఆశ, ప్రేరణలకు చెందిన వెలుగును ప్రసరిస్తుంది. భారతదేశం అయోధ్య రామమందిర ప్రారంభోత్సవానికి సిద్ధమవుతున్న తరుణంలో, ఈ ఆలయం ఆధ్యాత్మిక, సాంస్కృతిక మేల్కొలుపు స్థలంగా జాతికి వాగ్దానం చేస్తుంది. ఇది భారతదేశ అతి గొప్ప సాంస్కృతిక, మతపరమైన వారసత్వానికి ఒక స్మారక చిహ్నం. శ్రీరాముని శాశ్వత వారసత్వానికి నిదర్శనం.
-రాగి పని బ్రహ్మచారి
95424 64082
