టిన్నర్ డబ్బాలు తరలిస్తున్న ట్రక్కులో అగ్నిప్రమాదం..
దిశ, కార్వాన్ : ట్రక్కులో టిన్నర్ డబ్బాలు తరలిస్తుండగా ట్రక్కు అగ్నకి ఆహుతయిన ఘటన సోమవారం ఆసిఫ్ నగర్ పోలీస్ స్టేషన్ పరిధిలో వెలుగు చూసింది. ఆసిఫ్ నగర్ ఇన్స్పెక్టర్ నవీన్ తెలిపిన వివరాలు ఇలా ఉన్నాయి. ఆసిఫ్ నగర్ లోని ఫీల్ ఖానా వద్ద వెంకటేష్ అనే బొలెరో ట్రక్కు డ్రైవర్ టిన్నర్ డబ్బాలను ట్రక్కులో వేసుకొని తరలిస్తుండగా డబ్బామూత సరిగ్గా పెట్టక పోవడంతో డబ్బాలోని టిన్నర్ ట్రక్కు ఇంజిన్ పై పడి ఒక్కసారిగా మంటలు చెలరేగాయి. మంటలు అదుపులోకి తేవడానికి స్థానికులు విశ్వప్రయత్నాలు చేయగా పలితం లేకుండా పోయింది.
సమాచారం అందుకున్న పోలీసులు అగ్నిమాపక సిబ్బంది హుటాహుటిన సంఘటన స్థలానికి చేరుకొని మంటలను అదుపులోకి తీసుకోచ్చారు. ట్రక్కు మాత్రం పూర్తిగా అగ్నికి ఆహుతి అయ్యింది. ఎలాంటి ప్రాణహాని జరగకపోవడంతో స్థానికులు ఊపిరి పీల్చుకున్నారు. ఈ ప్రమాదంతో ఒక కిలోమీటర్ మేరకు భారీగా ట్రాఫిక్ జాం అయ్యింది. ఈ మేరకు పోలీసులు కేసునమోదు చేసి దర్యాప్తు చేస్తున్నారు.
