భారత్‌కు ఉపన్యాసాలు ఇవ్వొద్దు: భారతీయ అమెరికన్ చట్టసభ సభ్యులు

దిశ, నేషనల్ బ్యూరో: మానవ హక్కుల ఉల్లంఘనపై భారతదేశానికి ఉపన్యాసాలు ఇవ్వొద్దని భారతీయ అమెరికన్ చట్టసభ సభ్యులు పేర్కొన్నారు. ఈ అంశంపై ఇరు దేశాలు సామరస్యపూర్వకంగా చర్చించుకోవడం మేలని వారు సూచించారు. భారత్ 100 సంవత్సరాలకు పైగా విదేశీ పాలనలో ఉంది. అలాంటి దేశానికి మానవ హక్కుల గురించి తెలియజేయడం సరైనది కాదు. వలసరాజ్యాల శక్తులు ఉపన్యాసాలిస్తున్నాయని భారత్‌ పేర్కొంటుంది. కాబట్టి మన మాటలు ఎలాంటి ఫలితాన్ని ఇవ్వవు అని "దేశీ డిసైడ్స్" సమ్మిట్‌లో ఇండియన్ అమెరికన్ కమ్యూనిటీ సభ్యులతో కాంగ్రెస్ సభ్యుడు రో ఖన్నా అన్నారు. రెండు దేశాల్లో కూడా సమస్యలు ఉన్నాయి. వీటిని కలిసికట్టుగా పరిష్కరించుకోవాలి. ప్రజాస్వామ్యంలో అసంపూర్ణతలు, మానవ హక్కులను సమిష్టిగా ఎలా ముందుకు తీసుకువెళ్లాలి అనే అంశాలపై ఇరు దేశాలు చర్చించుకోవాలని ఖన్నా అన్నారు.

ఇదే సదస్సులో మాట్లాడిన మరో చట్టసభ సభ్యులు బేరా మాట్లాడుతూ, శక్తివంతమైన ప్రజాస్వామ్యంలో వాక్ స్వాతంత్య్రం, పత్రికా స్వేచ్ఛ, సామర్థ్యం అన్నీ ఉండాలని, భారత ప్రజాస్వామ్యం మనుగడ సాగిస్తుందని నేను ఖచ్చితంగా ఆశిస్తున్నాను అని అన్నారు. భారత్-అమెరికా మధ్య బలమైన బంధానికి తాను మొగ్గుచూపుతున్నట్లు థానేదార్ తెలిపారు. మాకు బలమైన అమెరికా-ఇండియా సంబంధం అవసరం. భారతదేశం చారిత్రాత్మకంగా రష్యా, యుఎస్‌కు రెండు వైపులా మంచి సంబంధాలను కలిగి ఉంది. కానీ భారత్ యునైటెడ్ స్టేట్స్‌తో బలమైన స్నేహానికి కట్టుబడి ఉండాల్సిన సమయం వచ్చింది. అమెరికా, భారత శక్తిని గుర్తించాలి. చైనా దూకుడును ఎదుర్కోవటానికి భారతదేశం ఉత్తమ పరిష్కారంగా ఉంది కాబట్టి, బలమైన భారతదేశం-అమెరికా బంధం కోసం కృషి చేస్తున్నాను అని ఆయన అన్నారు.