అవకతవకలకు పాల్పడిన ఎస్ఐ సస్పెన్షన్​

దిశ,దుబ్బాక : ఓ కేసులో అవకతవకలకు పాల్పడిన కారణంగా సిద్దిపేట జిల్లా భూంపల్లి పోలీస్ స్టేషన్ ఎస్ఐగా విధులు నిర్వహిస్తున్న వి.రవికాంత్ పై సస్పెన్షన్ వేటు వేస్తూ మల్టీ జోన్ 1 ఐజీపీ ఏవీ రంగనాథ్ ఉత్తర్వులు జారీ చేశారు. ఎస్ఐ వి. రవికాంత్ ను సస్పెండ్ చేస్తున్నట్లు పేర్కొన్నారు. ప్రస్తుతం సస్పెండ్ అయిన ఎస్ఐ రవికాంత్ గతంలో మెదక్ జిల్లా శివంపేట్ ఎస్ఐగా విధులు నిర్వహించే సమయంలో మామిడి తోటలో యాభై టన్నులకు పైగా మామిడి పండ్లు చోరీకి గురైనట్లుగా సంబంధిత మామిడి తోట యజమానురాలు

     ఇచ్చిన ఫిర్యాదుపై ఎస్ఐ తక్షణమే కేసు నమోదు చేయకుండా నిర్లక్ష్యంగా వ్యవహరించారని తేలింది. ఉన్నతాధికారుల ఆదేశాల మేరకు ఎస్ఐ కేసు నమోదు చేసిన కొద్ది రోజులకే... కేసు సివిల్ పరిధిలోకి వస్తుందని పోలీసు ఉన్నతాధికారులను తప్పుదోవ పట్టించి చోరీ కేసును సివిల్ వివాదం కేసుగా ముగించేందుకు ఎస్ఐ అవకతవకలకు పాల్పడ్డాడు. దాంతో పాటు భూతగాదా కేసుల్లో బాధితులకు కాకుండా వారి ప్రత్యర్థులకు సహకారం అందిస్తూ విధుల్లో నిర్లక్ష్యంగా వ్యవహరించినట్లుగా ఆరోపణలు రావడంతో మెదక్ ఎస్పీ సమర్పించిన విచారణ నివేదికలో ఎస్ఐ రవికాంత్ పై వచ్చిన ఆరోపణలు నిజమని తేలడంతో వి.రవికాంత్ ను సస్పెండ్ చేస్తూ ఉత్తర్వుల జారీ చేశారు.