BREAKING: ఫైనల్‌లో నిప్పులు చెరిగిన KKR బౌలర్స్.. 113 పరుగులకే SRH ఆలౌట్
ఐపీఎల్ సీజన్ 2024లో సంచలన విజయాలు నమోదు చేసిన సన్ రైజర్స్ హైదరాబాద్.. కీలకమైన ఫైనల్ పోరులో పూర్తిగా చేతులేత్తేసింది.
దిశ, వెబ్‌డెస్క్: ఐపీఎల్ సీజన్ 2024లో సంచలన విజయాలు నమోదు చేసిన సన్ రైజర్స్ హైదరాబాద్.. కీలకమైన ఫైనల్ పోరులో పూర్తిగా చేతులేత్తేసింది. హైదరాబాద్ బ్యాటర్లు పోటీ పడి మరీ పెవిలియన్‌కు క్యూ కట్టడంతో ప్రతిష్టాత్మక ఫైనల్ మ్యాచ్‌లో ఎస్ఆర్హెచ్ తక్కువ పరుగులకే చాప చుట్టేసింది. కాగా, ఐపీఎల్ ఫైనల్ మ్యాచ్‌లో భాగంగా చెన్నైలోని చెపాక్ స్టేడియం వేదికగా ఆదివారం సన్ రైజర్స్ హైదరాబాద్, కోల్‌కతా నైట్ రైడర్స్ తలపడ్డాయి. ఈ మ్యాచ్‌లో టాస్ గెలిచి మొదట బ్యాటింగ్‌కు దిగిన హైదరాబాద్ 18.3 ఓవర్లలో 113 పరుగులు చేసి ఆలౌట్ అయ్యింది.
సీజన్ ఆసాంతం అద్భుతంగా రాణించిన టాపార్డర్ కీలకమైన ఫైనల్ మ్యాచ్‌లో చేతులేత్తేసింది. ఈ సీజన్‌లో సిక్సుల వర్షం కురిపిస్తూ ఆకట్టుకున్న యంగ్ బ్యాటర్ అభిషేక్ శర్మ కేవలం 2 పరుగులు మాత్రమే చేసి ఔట్ కాగా, ఆస్ట్రేలియా విధ్వంసకర బ్యాటర్ ట్రావిస్ హెడ్ డకౌట్ అయ్యి పూర్తిగా నిరాశపర్చాడు. సునామీ ఇన్నింగ్‌లతో రెచ్చిపోతున్న ఇండియన్ ప్లేయర్ రాహుల్ త్రిపాఠి 9 పరుగులు మాత్రమే చేసి పెవిలియన్ చేరాడు. తెలుగు సంచలనం, బర్త్ డే బాయ్ నితీష్ రెడ్డి 10 పరుగులే చేసి ఔట్ అయ్యాడు. ఈ సీజన్‌లో హైదరాబాద్‌కు ఒంటి చేత్తో విజయాలు అందించిన క్లాసెన్‌ కూడా కేవలం 16 రన్స్ మాత్రమే చేసి ఈ మ్యాచ్‌లో ఏమి చేయలేకపోయాడు.
మార్క్రమ్ 20 రన్స్ చేసి పర్వాలేదనిపించాడు. కెప్టెన్ కమిన్స్ చివర్లో 24 పరుగులు చేసి హైదరాబాద్‌ను మూడంకెల స్కోర్ దాటించాడు. కోల్‌కతా స్టార్ బౌలర్ మిచెల్ స్టార్ నిప్పులు చెరిగే బంతులతో హైదరాబాద్ బ్యాటర్లను వణికించాడు. రెండు వికెట్లు తీసి హైదరాబాద్‌ను ఆరంభంలోనే కోలుకోలేని దెబ్బకొట్టాడు. కేకేఆర్ స్టార్ ఆల్ రౌండర్ రస్సెల్ 3 వికెట్లు తీసి ఎస్ఆర్హెచ్ నడ్డి విరిచాడు. హర్షిత్ రాణా రెండు వికెట్లు తీయగా.. సునీల్ నరైన్, వైభవ్ ఆరోరా, వరుణ్ చక్రవర్తి తలో వికెట్ సాధించారు. అనంతరం కేకేఆర్ 114 పరుగులు స్వల్ప లక్ష్యంగా బరిలోకి దిగింది.